SQO-da ótken táýlikte 13 aýdannyń tek tórteýinen ǵana koronavırýs anyqtaldy

PETROPAVL. QazAqparat – Soltústik Qazaqstan oblysynda sońǵy eki aı boıy órshigen koronavırýs saıabyrsyp, kúndelikti ınfektsııany juqtyratyndar sany eselep azaıdy, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, óńirde ótken táýlikte 185 adam PTR-test tapsyrsa, sonyń tek 50-inde koronavırýs rastaldy. Bul sońǵy birneshe aıdan bergi óńirdegi eń tómen kórsetkish. Qaýipti ınfektsııany juqtyrǵandardyń 37-si – Petropavl turǵyny, 13 aýdannyń tek tórteýinde ǵana syrqattanǵandar anyqtaldy. Sonyń ishinde 6 adam Taıynsha aýdanynda, M.Jumabaev aýdanynda 1 adam, Qyzyljar aýdanynda 4 adam jáne Aqjar aýdanynda 2 adam aýyrǵan.

Qazirgi ýaqytta oblystyń ınfektsııalyq statsıonarlarynda 306 naýqas em alyp jatyr, emdeý mekemeleri 18 %-ǵa ǵana júktelgen. Jansaqtaý bólimshesinde 34 adam jatyr. Ótken táýlikte 1 adam qaıtys boldy. Jalpy indet bastalǵaly SQO-da 416 adam kóz jumdy. Al KVI-dy juqtyrǵandar sany 34 331 bolsa, 30 587 adam táýir bolyp shyqty.