SQO-da ótken bir jylda kólikte jasalatyn qylmystar 24 paıyzǵa artqan
PETROPAVL. QazAqparat – Soltústik Qazaqstan oblysynda bıyl kólikte jasalǵan qylmys boıynsha 8 is sotqa jetse, sonyń jeteýi zańsyz esirtki saqtaýǵa qatysty, dep habarlaıdy QazAqparat tilshisi.
Soltústik Qazaqstannyń kólik prokýrory Abylaıbek Ordabaev quqyq qorǵaýshylar jáne polıtseılermen kezdesip, sotqa deıingi tergeý protsesinde jiberiletin quqyq buzýshylyqtarǵa qatysty birqatar problemalyq máselelerdi kóterdi.
«Azamattardyń konstıtýtsııalyq quqyqtaryn qorǵaý, onyń ishinde azaptaýlarǵa jol bermeý boıynsha qylmystyq isterdi tergeý kezindegi zańdylyqty saqtaý – negizgi mindet. QR Bas Prokýrory men Bas kólik prokýrorynyń tapsyrmalaryna sáıkes, elimiz boıynsha osyndaı is-sharalar ótip jatyr. Keıin mundaı kezdesýlerdi turaqty negizde uıymdastyrý josparlanǵan», - deıdi Abylaıbek Ordabaev.
Kólik prokýrorynyń aıtýynsha, 2020-2021 jylǵy kezeńde kóliktegi jasalǵan qylmystyq ister, sonyń ishinde esirtki saqtaý, urlyq 24 %-ǵa ósken. Jyl basynan zańsyz esirtki saqtaý boıynsha 7 qylmystyq is jáne bótenniń múlkin urlaýǵa qatysty 1 is sotta qaraldy.
«Quqyq qorǵaý organdarynyń fýnktsıonaldyq mindetterine sáıkes anyqtaý jáne tergeý júrgizý kezinde polıtseıler kúdiktilermen tikeleı qatynasta bolady. Azamattardyń konstıtýtsııalyq quqyqtaryn qamtamasyz etý jáne azaptaýdy boldyrmaý maqsatynda Petropavl stantsııasy jelilik polıtsııa bóliminde beınebaqylaýdyń bolýyn tekserdik. Zań buzýshylyqtar anyqtalǵan joq. Qosymsha prokýratýra ǵımaratynda 1-D júıesinde jelilik polıtsııa bólimine jetkizilgenderdiń kirgen jáne shyqqan ýaqyttary baqylaýǵa alynady. Osylaısha prokýratýra tarapynan azamattardyń zańda belgilengen 3 saǵat ýaqyttan astam bolmaýy qadaǵalanady», - deıdi oblystyń kólik prokýrory.
Elektrondy aqparattyq esepke sáıkes bıyl jelilik polıtsııa bólimshesine kýáger, jábirlenýshi, zańdy ókil, kúdikti retinde 169 adam jetkizilgen. Azamattar tarapynan zańsyz ustaý jáne azaptaý faktileri boıynsha shaǵymdar túsken joq.
«Tsıfrlyq Qazaqstan» memlekettik baǵdarlamasy qylmystyq isterdi elektrondyq formatta sapaly tergeýge múmkindik beredi. Bul jumys qylmystyq qýdalaý organdarynyń negizgi protsestik sheshimderdi qabyldaý kezinde zańdylyqty qamtamasyz etýge jáne sotqa deıingi tergep-tekserýdiń buzylýyna jol bermeýge baǵyttalǵan», - deıdi Abylaıbek Ordabaev.
