SQO-da ótken aıda zeınetaqy jáne áleýmettik tólemderge 12 mlrd teńge jumsaldy
PETROPAVL. QazAqparat – Soltústik Qazaqstan oblysynda 150 myńǵa jýyq adam zeınetaqy men áleýmettik tólemder alady, dep habarlaıdy QazAqparat tilshisi.
Eńbek, áleýmettik qorǵaý jáne kóshi-qon komıtetiniń SQO boıynsha departamentiniń málimeti boıynsha, bıyl qańtar-sáýir aılary aralyǵynda respýblıkalyq bıýdjetten kópbalaly analarǵa járdemaqyǵa 293 mln astam teńge, kópbalaly otbasylarǵa járdemaqy tóleýge 777 mln teńge jumsaldy.
2021 jylǵy 1 sáýirdegi jaǵdaı boıynsha SQO-da 3,9 myńnan astam adam kópbalaly ana retinde, 3,8 myńnan astam adam kópbalaly otbasy retinde járdemaqy alady.
Al 1 mamyrdaǵy jaǵdaı boıynsha SQO-da zeınetkerler sany 103 myńnan astam adamdy qurady. Memlekettik áleýmettik járdemaqy alýshylar sany 23 myń adamnan assa, arnaýly memlekettik járdemaqyny 14 myńǵa jýyq adam alady.
Mamandardyń aıtýynsha, 2021 jylǵy sáýirde oblys boıynsha respýblıkalyq bıýdjetten zeınetaqy jáne áleýmettik tólemderge 12 mlrd astam teńge qarajat jumsaldy.
Bazalyq zeınetaqy tólemin eskergende, 1 mamyrdaǵy jaǵdaı boıynsha zeınetaqy tólemderiniń ortasha mólsheri – 97 529 teńgeni qurady.
