SQO-da óte sırek kezdesetin aýrýmen týǵan shaqalaqqa ota jasaldy

PETROPAVL. QazAqparat – Soltústik Qazaqstan oblystyq balalar aýrýhanasynda damý aýytqýy, ıaǵnı sırek kezdesetin omfalotsele aýrýymen týǵan shaqalaqqa ota jasaldy, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, sábı birer kún buryn ǵana dúnıege kelgen.

Shaqalaq óte sırek kezdesetin jáne aýyr dert – omfalotsele dıagnozymen týdy.

ıAǵnı balanyń ishekteri, basqa qursaq músheleri qaryn tusynan syrtqa shyǵyp turǵan.

Ádette omfalotsele bar nárestelerde ishek tek juqa ulpa qabatymen jabylǵan jáne ony ońaı kórýge bolady. Sondaı-aq balanyń uıqy bezi ash ishekti basyp turǵan.

«Bul óte sırek kezdesetin damý aýytqýshylyǵy. Áıeldiń qursaǵyndaǵy balada osyndaı dert anyqtalǵan jaǵdaıda júktilik merzimine jetpeı toqtatylady nemese mundaı balalardy arnaıy ǵylymı ortalyqtarda týdyrady. Biraq, ókinishke oraı sábı oblystyq perınataldyq ortalyqta dúnıege keldi. Dárigerler qoldan kelgenniń bárin jasap, shaqalaqty aman-esen qabyldap aldy. Balany birden oblystyq balalar aýrýhanasyna jetkizip, jansaqtaý jáne qarqyndy terapııa kórsetildi», - deıdi mamandar.

Sırek kezdesetin dıagnoz qoıylǵan sábıge aýyr ota jasaý qajet boldy.

Jergilikti dárigerlerdiń qolynan kelgenimen, mundaı aýytqýshylyǵy bar sábıler ómirge anda-sanda bir keledi.

Sol sebepti Nur-Sultan qalasynan professor, QR bas neonataldy hırýrgi Asyljan Erekeshovty shaqyrýǵa sheshim qabyldandy.

Sanıtarlyq avıatsııamen jetkizilgen bilikti maman balaǵa saǵat 14.05-ten 15.30-ǵa deıin kúrdeli otany jasady. Operatsııa sátti ótti.

Shaqalaq tiri, biraq jaǵdaıy óte aýyr. Mamandardyń aıtýynsha, derttiń aýyrlyǵyna qatysty boljam jasaýǵa áli erte.

Qazirgi ýaqytta balaǵa barlyq tıisti em-dom kórsetilip jatyr.