SQO-da otbasyna tynyshtyq bermeıtin 500 tóbelesqumar jazalandy
PETROPAVL. QazAqparat - Soltústikqazaqstandyq polıtseıler jyl basynan beri 500 tóbelesqumar azamatty jaýapqa tartty, dep habarlaıdy QazAqparat.
Oblystyq ishki ister departamenti baspasóz qyzmetiniń málimetinshe, tártip saqshylary úıler men páterlerdi aralap, úı ıelerine polıtsııa ýchaskelik pýnktiniń baılanys nómirleri jazylǵan «vızıtkalardy» tabystaýda. Sondaı-aq, olar otbasyndaǵy jaǵdaıǵa qyzyǵýshylyq tanytyp, quqyqtyq taqyryp boıynsha keńester júrgizip jatyr.
«Petropavldyń Podgorıa aýdanynda júrgizilgen reıd qorytyndysy kórsetkendeı, otbasyna maza bermeıtin tóbeleskishterdiń basym bóligi - ajyrasqan, alkogoldi ishimdikti kóp ishetin, 36 jastan asqan er adamdar. Olardyń agressııasy jaqyn týystaryna, ásirese - týǵan ata-anasyna baǵyttalǵan. Janjal jıi týyndaıtyn ár otbasy ýchaskelik ınspektordyń baqylaýynda», - dedi baspasóz qyzmetinen. 
Kún saıyn áıelderdi zorlyq-zombylyqtan qorǵaý bóliminiń qyzmetkerleri otbasyndaǵy qylmystardyń jáne quqyq buzýshylyqtardyń aldyn alýmen jáne olardy anyqtaýmen aınalysýda.
Jyl basynan beri qalalyq ІІB qyzmetkerleri «Otbasylyq jáne turmystyq qatynastar salasyndaǵy zańsyz áreketter» baby boıynsha 549 zań buzýshyny jaýapqa tartqan. Ol boıynsha eskertýler berilip, 3 táýlikke ákimshilik qamaýǵa alǵan.
