SQO-da otbasylyq janjalqoılarǵa tıisti jaza qoldanylmaı kelgen

PETROPAVL. KAZINFORM – Soltústik Qazaqstan oblysynda prokýrorlar turmystyq zorlyq-zombylyqpen kúres barysynda formalızm men nemquraılylyqqa jol berilgenin anyqtady.

Bul týraly Zzńdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda aıtyldy. 

SQO prokýrorynyń orynbasary Aleksandr Trıkachevtiń aıtýynsha, quqyq qorǵaý organdary turmystyq janjal shyǵarýshylarǵa qatysty qorǵanys nusqamalaryn ýaqytyly qoldanbaıdy, keıbir agressorlar tipti jaýapkershilikten múlde sytylyp ketedi. Al zardap shekken keı áıelder ózderi kináli bolyp shyǵyp, aıyppul tólegen. 

Mysaly, Petropavlda turaqty túrde janjal shyǵaratyn toǵyz adamǵa qatysty qorǵanys nusqamalary men arnaıy minez-qulyq talaptary qoldanylmaǵan. Al Esil jáne Shal aqyn aýdandarynda otbasylyq janjal úshin jaýapqa tartý ornyna, agressorlar jazadan jaltaryp, tek jeńil baptarmen shektelgen.

Esil jáne Aqjar aýdandarynda quqyq buzýshylardyń áreketterine durys quqyqtyq baǵa berilmeı, olardyń áreketteri jeńildetilip kórsetilgen. Al, Tımırıazev, Qyzyljar jáne Aqjar aýdandarynda janjalqoılarǵa qarsy aryz jazýdan bas tartqany úshin zardap shegýshilerge jalǵan shaqyrý jasady dep aıyp taǵylyp, aıyppul salynǵan. Bul sheshimderdiń barlyǵy keıin joıylyp, áıelderge aqshalary qaıtaryldy. 

- Qylmystyq ister boıynsha da eleýli kemshilikter bar. Nebary 46 qylmystyq is qozǵalyp, olardy tergeý merzimderi saqtalmaǵan, tolyq tergelmegen. Keı jaǵdaılarda saraptamalar taǵaıyndalmastan, aryzdar narıad arqyly esepten shyǵarylǵan. Bul – quqyq qorǵaý organdary tarapynan nemquraılyqtyń belgisi.

Munyń sońy qaıǵyly aıaqtalady. Mysaly, Taıynsha aýdanynda anasyna únemi qol kóterip júrgen uly aqyry ony óltirip tyndy (Bondar isi). Petropavlda kezekti janjaldyń birinde azamattyq nekedegi kúıeýine aýyr dene jaraqatyn salǵan (Veresova oqıǵasy). Osyǵan uqsas jaǵdaılar Ǵ. Músirepov, M. Jumabaev aýdandarynda da boldy, - deı di Aleksandr Trıkachev.
Prokýrordyń aıtýynsha, keıde tıisti organdar tarapynan formalızm tanytylyp, másele elenbeı qalady. Mysaly, Shal aqyn aýdanynda Tasmýrzınova esimdi áıeldi birge turatyn er adam birneshe ret soqqyǵa jyqqan, barar jeri joq ol zorlyq-zombylyqtan sýıtsıd jasaýǵa da árekettengen. Prokýratýranyń úılestirýimen áıel jumyssyz retinde tirkelip, oǵan ishimdikke táýeldilikten arylýǵa kómek kórsetilgen.

- Zardap shegýshilerdiń kópshiligi kómek alý múmkindigi týraly múlde habarsyz bolǵan. Bul – aqparattandyrý jumysynyń álsizdigin kórsetedi. Áıelder isteri jáne otbasylyq-demografııalyq saıasat jónindegi komıssııalardyń jumysy tek jalpy usynymdarmen shektelgen, bul – túbegeıli ózgeris qajet ekeniniń aıǵaǵy, - deıdi Aleksandr Trıkachev. 

Buǵan deıin SQO-nyń birneshe aýdanynda balaǵa qatysty týystary tarapynan seksýaldy zorlyq-zombylyq jasalǵanyn jazǵan edik.