SQO-da osy kúnge deıin 7,5 myń sheteldik avtomobıl zańdastyryldy
SQO polıtsııa departamenti baspasóz qyzmetiniń málimetinshe, ákimshilik polıtsııasynyń qyzmetkerleri belgilengen merzim aıaqtalar aldynda QR Úkimetiniń sheteldik esepte turǵan kólik quraldaryn zańdastyrýǵa qatysty sheshimin túsindirý úshin avtokólik júrgizýshilerimen kezdesti.
1 shilde kúni Qazaqstan Respýblıkasyna 2022 jylǵy 1 qyrkúıekke deıin ákelingen sheteldik avtomobılderdi zańdastyrý merzimi aıaqtalady.
QR Úkimeti osyndaı avtomobılderdi 5 jyl merzimge ýaqytsha esepke alýǵa ruqsat berdi.
Osy aralyqta kólik ıesi zańdastyrý sharttary boıynsha memlekettik tirkeýden ótýi tıis nemese kólikti elden shyǵarýy tıis.
Biraq, mindetti talap — 2023 jylǵy 1 shildege deıin zańdastyrýǵa ótinim berý.
«Jınalǵandar kúrdeli máselelerdi kóterdi, máselen, eger basqa memlekettiń aýmaǵynda kólik quralyna shekteý qoıylsa, qalaı áreket etý kerek degen sııaqty. Qyzmetkerler rásimnen ótý tártibin egjeı-tegjeıli túsindirip jatyr. Taǵy da atap ótemiz: eń bastysy — 1 shildege deıin ótinish berýge úlgerý qajet. Zańdastyrýǵa qatysty barlyq másele boıynsha protsessıng ortalyǵynyń qyzmetkerlerinen 8 (7152) 32-00-22, 32-00-19 telefondary boıynsha nemese Petropavl q., M.Áýezov kóshesi, 157, 5 kabınetten aqparat alýǵa bolady», — deıdi SQO PD ákimshilik polıtsııa basqarmasynyń bastyǵy Serik Áljanov.
Polıtseılerdiń aıtýynsha, búgingi tańda oblysta 7495 sheteldik avtokólik zańdastyrylǵan, onyń ishinde 88-i – «konstrýktor», ıaǵnı olar elimizge qosalqy bólshek túrinde ákelingen.
