SQO-da órttiń aýmaǵy 450 gektarǵa jetti, sóndirý jumystary jalǵasýda

PETROPAVL. QazAqparat - 13 shildede saǵat 13.30-da 101 pýltine Tuǵyrjap selosynan 7 km jerde, 40 ga alańda qurǵaq shóp janyp jatqany týraly aqparat túsken, dep habarlaıdy QazAqparat.

TJM málimetinshe,, órt Orlınogorsk orman sharýashylyǵynyń aýmaǵyn sharpyp, 2,7 gektar alańdy qamtyǵan.

Orman alqaptary men eldi mekenderge qaýip joq.

«Órtti sóndirý úshin Soltústik Qazaqstan oblysynyń TJ departamenti bólimsheleriniń kúshteri men quraldary, orman sharýashylyǵy jáne jergilikti atqarýshy organdary jeke quramynan 92 adam jáne 13 tehnıka dereý jumyldyryldy. Aýmaqtardy jyrtý, qarama-qarsy órt qoıý tásilin paıdalaný, barlyq qolda bar quraldarmen sóndirý arqyly órtti toqtatý boıynsha jumys júrgizildi», - delingen vedomstvo aqparatynda.

Saǵat 15.50-de orman sharýashylyǵy aýmaǵyndaǵy órt sóndirildi. Ashyq aýmaqta qurǵaq shóptiń janýy jalǵasýda.

Jergilikti atqarýshy organdardyń málimetinshe, qazirgi ýaqytta órttiń aýdany 450 gektardy quraıdy. Aýa temperatýrasynyń joǵary (+35 gradýs), jeldiń (10-15 m/sek.) bolýy, taý-tasty jer órtti sóndirýdi qıyndaýda.

Sınoptıkterdiń boljamy boıynsha jaýyn-shashyn kútilýde.

Jaǵdaı oblys basshylyǵy men Soltústik Qazaqstan oblysy TJ departamentiniń turaqty baqylaýynda tur.