SQO-da órttiń aldyn alý maqsatynda 53 jedel mobıldi top quryldy

PETROPAVL. QazAqparat – Soltústik Qazaqstan oblysynda órt qaýipti kezeńniń bastalýymen 53 jedel mobıldi top qurylǵan. Nátıjesinde qaýipsizdik talabyn buzǵan 151 adam anyqtalyp, onyń toǵyzyna aıyppul salyndy, dep habarlaıdy QazAqparat tilshisi.

Óńirlik kommýnıkatsııalar qyzmetinde «Órttiń qaýipti mezgilinde órt qaýipsizdigi erejelerin saqtaý» baspasóz konferentsııasy ótti.

SQO Tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, oblys aýmaǵynda bıyl 251 órt bolyp, 14 adam qaza tapty, 10-y jaralandy. 27 adamǵa ıis tıse, 9 adam tútinge tunshyǵyp mert bolǵan.

«Orman, dala órti tolastamaı tur. Búgingi kúni 57 ga ormandy alqapta 14 órt tirkeldi. Onyń barlyǵynda qurǵaq shóp janyp, keıin ormanǵa aýysqan. Joldar men ormandardyń mańynda mıneraldy jolaqtardyń bolmaýy da sebep bolǵan.

Al órt qaýipti kezeń bastalǵaly qoqys pen qurǵaq shópti jaǵýdan 22 órt tirkeldi. Jalpy osy aralyqta 400 ret órt shyǵyp, jalpy aýmaǵy 430 ga jer jandy», - deıdi Dmıtrıı Rastıhın.

Órttiń aldyn alý maqsatynda órt sóndirýshiler polıtsııa, jergilikti atqarýshy organdarmen jáne orman mekemelerimen birlese jumys istep jatyr. Quramyna 314 adam kiretin 53 jedel mobıldi top quryldy. Mamandar reıdter barysynda 151 zań buzýshyny anyqtap, olardyń 142-sine eskertý túrindegi ákimshilik jaza qoldandy. Toǵyzyna 190 myń teńgeniń aıyppulyn saldy.