SQO-da órtten zardap shekken kópbalaly otbasyna úı beriledi
PETROPAVL. QazAqparat - Soltústik Qazaqstan oblysynda bes balasy bar otbasy baspanasyz qaldy, dep habarlaıdy QazAqparat.
Óńirlik kommýnıkatsııalar qyzmetiniń habarlaýynsha, tótenshe jaǵdaı Shal aqyn aýdanynyń Stýpınka aýylynda bolǵan. Órt bolǵan kezde úıde 4 balalasymen birge anasy bolǵan. Olar oqıǵa kezinde qaýipsiz jerge shyǵyp, órt sóndirýshilerdi shaqyrǵan. Otaǵasy bolsa úlken qyzymen birge Shymkentte júrgen.
Órt sóndirýshiler oqıǵa ornyna shuǵyl jetip, az ǵana ýaqytta órtti sóndirip úlgergen. Zardap shekkenderge tıisti kómek kórsetildi. Azdaǵan dene jaraqattaryn alǵan olar ortalyq aýdandyq aýrýhanada jatyr.
Aýdan ákiminiń málimetinshe, otbasyna úı alyp berip, otynmen, qajetti jıhazdarmen qamtamasyz etý baǵytynda tıisti kómek kórsetiledi. Sondaı-aq olardyń qujattaryn da qalpyna keltirýge qolǵabys etiledi. Osy kezde aqsha, azyq-túlik pen kıim-keshek alý úshin qarjy jınalyp jatyr.
Órttiń sebebi anyqtalýda.
