SQO-da órtten er adamdy kóterip shyǵarǵan boıjetken marapattaldy

PETROPAVL. QazAqparat – Petropavl qalasynyń turǵyny Marııa Sımonova «Órtte kórsetken qaısarlyǵy úshin» medalimen marapattaldy. Jaqynda boıjetken janyp jatqan úıden er adamdy alyp shyǵyp, ony aman alyp qalǵan edi, dep habarlaıdy QazAqparat tilshisi.

Marııa Sımonovaǵa órt kezinde kórsetken batyldyǵy men azamattyq boryshyn adal oryndaǵany úshin laıyqty marapat - «Órtte kórsetken qaısarlyǵy úshin» medali saltanatty túrde tabys etildi. Soltústik Qazaqstan oblysy tótenshe jaǵdaılar departamentiniń málimetinshe, jańa jyldyń alǵashqy kúni keshke Marııa Sımonova Jumysshy kentindegi K.Tsetkın kóshesi, 90 «A» mekenjaıyndaǵy úıden órt shyqqanyn baıqap qalady. Qalyń tútindi kórgen ol birden kómekke umtylady. Úıdiń esigin ashqan qyz esikke jete almaı eńbektegen er adamǵa shyǵýǵa kómektesedi. Keıin dereý órt sóndirýshilerdi shaqyrǵan.

«Men kóre sala júgirdim, ol kezde birdeńeni oılaýǵa da mursham bolmady. Er adamdy kóterip shyǵarýǵa qalaı kúshimniń jetkenine qazir tań qalamyn. Qorshaýdyń janyna otyrǵyzyp, esin jıǵyzdym. Ol úıde taǵy bir er adamnyń barlyǵyn aıtty. Biraq onda qaıta kirý múmkin emes edi. Bul kezde órt sóndirýshiler de kelip úlgerdi», - deıdi Marııa Sımonova.

Qutqarylǵan 32 jastaǵy er adamnyń qol men basy shamaly kúıik alǵan, aýrýhanaǵa jatqyzýdyń qajeti bolmady. Marııa Sımonova ata-anasymen birge órt bolǵan úıge jaqyn jerde turady. Boıjetken Petropavldaǵy tehnıkalyq kolledjiniń 4 kýrs stýdenti, tehnık-mehanık mamandyǵyna oqyp jatyr.

Foto: Soltústik Qazaqstan oblysy tótenshe jaǵdaılar departamenti