SQO-da órtten eki adam kóz jumdy
PETROPAVL. KAZINFORM —11 qańtar kúni keshki ýaqytta Soltústik Qazaqstan oblysy Maǵjan Jumabaev aýdanynyń Maıbalyq aýylynda jeke turǵyn úıde órt shyqty. Oqıǵa ornynan órt sóndirýshiler eki adamnyń máıitin tapty. Bul týraly TJM baspasóz qyzmeti málim etti.
101 pýltine habarlama túskennen keıin órtke qarsy qyzmettiń bólimsheleri jedel túrde jiberildi. Qutqarýshylar oqıǵa ornyna kelgen kezde turǵyn úıdiń tolyqtaı otqa oranyp, tolyq qıraǵany anyqtaldy.
Úı ıesiniń aıtýynsha, órt bolǵan sátte úıde onyń jubaıy jáne eki kámeletke tolmaǵan bala bolǵan. Órtti sóndirý jáne úıindilerdi bólshekteý barysynda qutqarýshylar er adam men bir kámeletke tolmaǵan balanyń máıitin tapqan. Endi bir adamndy izdeý jumystary jalǵasyp jatyr.
Oqıǵa ornynda departament basshylyǵy jumys istep jatyr, TJD psıhologtary úı ıesine qajetti psıhologııalyq kómek kórsetip jatyr.
Órt 64 sharshy metr aýmaqta tolyqtaı sóndirildi. Órttiń shyǵý sebebi anyqtalyp jatyr. Órtti sóndirýge TJD-nyń jeke quramynan 24 qyzmetker men 6 birlik tehnıka, sondaı-aq «Agrofırma» JShS-niń erikti órtke qarsy qurylymy qatysty.
TJM azamattardy peshpen jylytý, elektr jáne gaz jabdyqtaryn paıdalaný kezinde órt qaýipsizdigi erejelerin qatań saqtaýǵa shaqyrady.
Buǵan deıin BQO-da órt bolǵan jerden eki adamnyń denesi tabylǵan edi.