SQO-da órtten 80 jastaǵy keıýana qutqaryldy
PETROPAVL. QazAqparat – Soltústik Qazaqstan oblysynda patrýldi polıtsııa batalonynyń ekıpajy aýyl turǵynyn, 80 jastaǵy áıeldi tútinge oranǵan úıden alyp shyqty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 7 tamyzda saǵata 5.00 shamasynda bolǵan. Aıyrtaý aýdanynda kezekshilikte júrgen patrýldi polıtsııa batalonynyń ınspektorlaryna aýdan ortalyǵy Saýmalkóldegi Lermontov kóshesinde bir turǵyn úıdiń órtengeni týraly habarlama túsedi.
Oqıǵa ornyna jedel jetken polıtsııa leıtenanttary Azamat Búkúev pen Nursultan Ospanov jeke turǵyn úıdiń jabyq aýlasynyń kók tútinge oranyp, jalyndap jatqanyn kóredi. Azamat úsh gaz ballonyn shyǵaryp, úıge kirip ketken áriptesine kómekke umtylady.
«Kók tútin úıge de kirip úlgeripti. Úı ıesi – zeınetker áıel tútinge tunshyǵyp, ózdiginen shyǵa almaı jatyr eken. Eki jaqtap súıemeldep, dalaǵa alyp shyqtyq. Ótinishi boıynsha dárilerin de alýdy umytpadyq. Kólikke otyrǵyzyp, úıdiń bólmelerin taǵy bir qarap shyqtyq. Osy kezde kórshileri de kep úlgerdi. Bárimiz birge shelekpen órtti sóndirýge kiristik», - deıdi Azamat Búkúev.
Kóp uzamaı órt sóndirýshiler de jetip, órtti tolyq sóndirdi. Al polıtsııa qyzmetkerleri bolsa keıýanany balasynyń úıine aman-esen jetkizdi.
Ekinshi kúni zeınetkerdiń aǵasy Aleksandr Maımeskýlov Kókshetaýdan kelip, apasyn qutqaryp qalǵan polıtsııa qyzmetkerlerine alǵysyn jaýdyrdy.
Azamat Búkúev pen Nursultan Ospanov bul áreketterin erlikke jatqyzbaıdy, aıtýlarynsha, olar halyqqa kómektesýge mindetti, qyzmetteri sondaı. Ári órtti órshitpeı tez arada sóndirýge Saýmalkóldiń basqa turǵyndary da kómektesken.
Azamat Búkúev áriptesi Erlan Dankınmen birge osydan eki jyl buryn da 7 adamdy órtten qutqarǵan edi.
Keıin eki tártip saqshysynyń erligi eskerýsiz qalmaı, olar ishki ister mınıstri Erlan Turǵymbaevtyń buıryǵymen «Órtte kórsetken erligi úshin» medalimen marapattaldy.
