SQO-da órtten 44 adam mert boldy, onyń altaýy - bala
PETROPAVL. KAZINFORM – Soltústik Qazaqstan oblysynda prokýratýra Tótenshe jaǵdaılar departamentiniń jumysyn synǵa aldy.
Oǵan sebep te joq emes. Vedomstvonyń málimetinshe, 2024 jyly jáne osy jyldyń alǵashqy úsh aıynda óńirde 558 órt tirkelip, 44 adam, onyń ishinde 6 bala mert bolǵan. 56 adam zardap shekken. Keltirilgen jalpy materıaldyq shyǵyn 260 mln teńgege jetip otyr.
Osyǵan oraı SQO prokýratýrasynda oblystyq tótenshe jaǵdaılar departamenti men onyń aýmaqtyq bólimshelerindegi azamattyq qorǵaý, sonyń ishinde órt qaýipsizdigi salasyndaǵy zańdylyqtyń saqtalý máselesi boıynsha vedomstvoaralyq keńes ótti. Jıynǵa oblystyq jáne aýdandyq deńgeıdegi tótenshe jaǵdaılar vedomstvolarynyń basshylary qatysty.
Prokýrorlardyń aıtýynsha, tekserýlerdi sapasyz júrgizý, nusqamalardyń oryndalýyn baqylaýdyń bolmaýy, tekserý merzimderin buzý jáne tıisti habarlamalardy tapsyrýda zań buzý faktileri bar.
Oblys prokýrorynyń birinshi orynbasary Ábý-Álı Sattar órt qaýipsizdigi máselesiniń ózektiligine toqtalyp, onyń turǵyndardyń ómiri men densaýlyǵyna tikeleı áser etetinin atap ótti. Sondyqtan bul salada barlyq jaýapty organdar tıimdi ári úılesimdi jumys isteýi tıis ekendigi eskertildi.
Keńes qorytyndysy boıynsha oblystyq tótenshe jaǵdaılar departamentine anyqtalǵan zańbuzýshylyqtardy joıý jáne aýmaqtyq bólimshelerdiń qyzmetine baqylaýdy kúsheıtý jóninde naqty tapsyrmalar berildi.
Tekserý nátıjesinde prokýratýra organdary 10 qadaǵalaý aktisin engizip, olardyń negizinde zańbuzýshylyqtardy joıý boıynsha sharalar qabyldanyp jatyr.
Buǵan deıin SQO joldarynda bıyl 16 adam mert bolǵanyn jazǵan edik.