SQO-da órtten 4 jasar sábı kóz jumdy
PETROPAVL. QazAqparat - Soltústik Qazaqstan oblysynyń Aıyrtaý aýdanyndaǵy Shalqar aýylynda úı órtendi, dep habarlaıdy QazAqparat tilshisi.
Soltústik Qazaqstan oblystyq tótenshe jaǵdaılar departamenti baspasóz qyzmetiniń habarlaýynsha, órt saldarynan 4 jastaǵy bala qaza tapqan. Jergilikti turǵyndar órt sóndirýshiler jetkenshe balanyń denesin órtke oranǵan úıden alyp shyqqan.
Taǵy úsh bala úıden shyǵyp úlgergen. Órt tutanǵan kezde 12 jastaǵy bala syrtqa shyǵyp úlgergen. Ol anasymen birge bólmelerdiń biriniń terezesin syndyryp, 8 jáne 10 jastaǵy qyzdardy qutqarǵan. Al 4 jasar balany tabýǵa qara tútin men laýlaǵan jalyn kedergi jasaǵan.
Qutqarýshylardyń aıtýynsha, úı ıesi jumysqa ketken, áıeli balalarmen birge úıde qalǵan. Az ýaqytqa úıden shyqqan áıel qara tútindi kózi shalǵan.
Úımen birge Opel Vectra mashınasy, «ÝRAL» mototsıkli, taǵy basqa múlikter órtenip ketken.
«Oqys oqıǵa týraly habardyń kesh túsýi, eldi mekenniń eń jaqyn órt sóndirý bólimshesinen qashyqta ornalasýy, aýa raıy - jaǵdaıdy qıyndatqan. Jalyn 144 sharshy metrdi sharpyǵan. 3 gaz ballony evakýatsııalandy», - dep málimdedi baspasóz qyzmetiniń ókilderi.
Boljamdarǵa qaraǵanda, órttiń tutanýyna peshtiń qamys qabyrǵany shekten tys qyzdyrýy sebep bolǵan.
