SQO-da órtten 4 adam qaza tapty
PETROPAVL. QazAqparat - SQO-da 4 adam órtten qaza tapty. Qaıǵyly oqıǵa keshe Mamlıýt jáne Aıyrtaý aýdandarynda bolǵan, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, sáýirdiń 21 kúni keshki toǵyzdar shamasynda Mamlıýt aýdanyndaǵy Skachkov kóshesindegi turǵyn úıden órt shyqqan. Qutqarýshylar oqıǵa ornyna jetkende baspana otqa oranyp úlgeripti. Kórshileriniń aıtýynsha, úı ishinde adamdar bolǵan.
Órt sóndirýshiler úsh adamnyń: 42 jastaǵy úı ıesi jáne 49 jastaǵy er adamdardyń, 36 jastaǵy kelinshektiń denesin alyp shyqty. Shamamen eki saǵattyń ishinde órt tolyǵymen sóndirildi.
Mamandardyń aıtýynsha, órt - 70 sharshy metr aýmaqty sharpydy, saldarynan úıdiń shatyry, tóbesi búlindi, jıhazdarǵa zaqym kelgen. Órttiń shyǵý sebepteri men kelgen shyǵyn mólsheri anyqtalyp jatyr.
Al, Aıyrtaý aýdanyndaǵy Lavrovka eldimekeninde «Lavrovka» JShS-niń aýmaǵynda ornalasqan kúzetshiniń úıi órttenip ketti. Eki sharshy metr aýmaqta shyqqan órtti seriktestik óz kúshimen sóndirdi. Oqıǵa ornynan 56 jastaǵy er adamnyń múrdesi tabyldy. Mamandardyń aıtýynsha, peshtiń shoǵy edenge túsip, órttiń shyǵýyna sebep bolýy múmkin.
