SQO-da órtengen úıden turǵyndy alyp shyqqan er adam marapattaldy
PETROPAVL. QazAqparat – Soltústik Qazaqstan oblysynyń tótenshe jaǵdaılar departamenti órttengen úıden adamdy alyp shyǵyp, ómirin saqtap qalǵany úshin kásibı boksshy Evgenıı Pavlovty «Tótenshe jaǵdaıdaǵy erligi úshin» medalimen nagradtady, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, oqys oqıǵa 24 qarasha kúni saǵat túngi birler shamasynda Petropavldaǵy Jumysshy kentinde bolǵan. Evgenıı Pavlov úıinde otyryp, terezeden kórshi Horvat, 51 mekenjaıyndaǵy úıden shyqqan jalyndy baıqap qalady. Ol birden kómekke umtylyp, adamdardyń nazaryn aýdarý úshin jolda turǵan «Gazeldiń» dabylqaqqyshyn qosady.
«Kórshi úıdiń esigine júgirdim. Órtke oranǵan úıden men qutqarǵan zardap shegýshiniń uly shyǵyp kele jatyr eken. Ol jaqta taǵy bireý qaldy ma dep suradym. Jigit múliktiń barlyǵy tolyǵymen janyp ketkenin aıtyp, barmaı aq qoı dedi. Spırttik ishimdik ishkeni baıqalyp turdy. Men onda qart adamnyń turatynyn bilýshi edim. Ákemniń dosy. Qulaǵy durys estimeıdi, kózi kórmeıdi. Sol sebepti jigitti tyńdamaı, janǵan úıge kirdim», - deıdi Evgenıı Pavlov.
Jigittiń aıtýynsha, baspana jalynǵa oranyp, kók tútinmen ýly gaz kózdi ashyrmaǵan. Ol júresinen otyryp, jerde jatqan kórshisin kóredi. Sportshy jigit er adamdy kóterip alyp, dalaǵa alyp shyǵady.
«5 mınýttan keıin órt sóndirýshiler de jetti. Al men kórshimdi úıge ákelip, alǵashqy medıtsınalyq kómekti kórsettim. Sol sátteadamdy qutqarýdan basqa oı bolǵan joq», - deıdi Evgenıı Pavlov.
Órtte adamnyń ómirin qutqarý kezinde kórsetken batyldyǵy, janqııarlyǵy jáne azamattyq boryshyn adal oryndaǵany úshin Evgenıı Pavlov laıyqty marapatty aldy. Oǵan Táýelsizdik kúni qarsańynda saltanatty túrde «Tótenshe jaǵdaıdaǵy erligi úshin» medali tabys etildi.
