SQO-da órtengen úıden áıeldiń denesi tabyldy
PETROPAVL. QazAqparat – Soltústik Qazaqstan oblysy Chervonnoe eldi mekeninde turǵyn úıden órt shyǵyp, bir áıel qaza tapty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 2 mamyr kúni bolǵan. Ǵabıt Músirepov aýdany, Chervonnoe eldi mekenindegi Shkolnaıa kóshesinde jeke turǵyn úı órtendi. Jalyn 80 sharshy metr aýmaqty sharpydy. Órt sóndirýshiler baspananyń as bólmesinen 54 jastaǵy áıel adamnyń denesin tapty.
Aldyn-ala boljam boıynsha, órttiń shyǵýyna otty abaısyz paıdalaný sebep bolǵan.
Jalpy, jyl basynan SQO-da órt saldarynan 16 adam qaza bolyp, 7 adam jaraqat aldy. Mamandardyń aıtýynsha, tilsiz jaý qurbany kóbine áleýmetke beıimdelmegen jáne ishimdikke salynǵan adamdar bolady.
