SQO-da órtengen turǵyn úıden áıeldiń denesi tabyldy
PETROPAVL. QazAqparat – Soltústik Qazaqstan oblysy Arhangelka eldimekeninde turǵyn úıden órt shyǵyp, 81 jastaǵy áıel qaza tapty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, 8 jeltoqsan kúni saǵat 16.30 shamasynda Qyzyljar aýdany, Beskól aýylynyń № 13 órt sóndirý bólimine Arhangelka eldimekeninde turǵyn úıdiń órtenip jatqany týraly habarlama kelip túsedi.
Órt sóndirýshiler birden oqıǵa ornyna attanady. Beskól men Arhangelka aýyldarynyń arasy 28 shaqyrym.
Mamandar jetkenshe jarty saǵattan ótip ketken. Olar kelgende jalyn búkil úıge jaıylyp úlgeripti.
49 sharshy metr aýmaqty sharpyǵan órt tek eki saǵattan keıin ǵana sóndirildi. Baspana tolyq janyp ketti. Al úıdiń ishinen úı ıesi – 81 jastaǵy áıeldiń denesi tabyldy.
Ázirge órttiń neden shyqqany belgisiz.
