SQO-da órtengen dúkendi mamandar úsh saǵat boıy sóndirdi
PETROPAVL. QazAqparat - Soltústik Qazaqstan oblysy Aıyrtaý aýdanynyń ortalyǵy Saýmalkólde qurylys materıaldaryn satatyn dúken órtenip, mamandar úsh saǵat boıy jalynmen alysty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, Saýmalkól eldi mekeniniń ıAnko, 37 kóshesinde ornalasqan «Megastroı» dúkeni búgin keshki saǵat 05-ter shamasynda otqa oranǵan. Oqıǵa ornyna aýdannyń órt sóndirýshileri, Aryqbalyq selosynyń jáne Aıyrtaý elevatorynyń órt sóndirý beketteri jumyldyryldy. Barlyǵy 8 tehnıka men 34 adam jumys istedi.
«Alǵashqy órt sóndirý bólimsheleri kelgen kezde dúkennen qoıý qara tútin shyǵyp, lapyldap janyp jatty. Órtti sóndirý qıynǵa soqty. Sebebi, boıaý, qurylys materıaldary sekildi janǵysh zattar kóp boldy. Ári órt shyqqandyǵy jóninde habar kesh berilgen. Sondaı-aq ǵımarattyń metallsaıdıngpen, sendvıchpanelmen qaptalýy da otty tez sóndirýge kedergi keltirdi», - deıdi órt sóndirýshiler.
Órt úsh saǵattyń ishinde tolyq sóndirildi. Qasynda ornalasqan meımanhana ǵımaratyna jalynnyń taralýyna jol berilgen joq. Órt sharpyǵan aýmaq - 898 sharshy metr. Qazirgi ýaqytta órttiń neden shyqqany jáne kelgen shyǵyn anyqtalyp jatyr.
