SQO-da Ortalyq Azııadan kelgen 3 myń mıgrant eńbek etedi
SQO Polıtsııa departamenti baspasóz qyzmetiniń málimetinshe, bıyl óńirde Ortalyq Azııadan kelgen 3 myńǵa jýyq azamat jumys tapqan. Mıgranttardyń basym bóligi – 1908 adam – Ózbekstannyń turǵyndary. Ázerbaıjan men Tájikstannan jumys izdep keletinderdiń de sany az emes. Moldovııa men Grýzııanyń azamattary da kóshi-qon qyzmetinde ruqsat alǵan. Polıtsııa qyzmetkerleriniń aıtýynsha, sheteldik jumysshylar negizinen qurylys salasynda jumys isteıdi jáne jóndeý jumystarymen aınalysady.
Óńirge kelgen eńbek mıgranttarynyń 341-i – áıelder. Olar kóbine bala baǵýshy nemese úı qyzmetshisi bolyp ornalasady eken.
Jyl basynan kóshi-qon qyzmeti 230 myńǵa jýyq memlekettik qyzmet kórsetken. Olardyń basym bóligi QR azamattaryn turǵylyqty jeri boıynsha tirkeýge qatysty. Sondaı-aq 63 myń soltústikqazaqstandyq kóshi-qon qyzmetine meken jaı anyqtamasyn alý úshin kelgen. Taǵy 43 myń turǵynǵa tólqujat pen jeke bas kýáligi berilgen.
«Memleket basshysy Qasym-Jomart Toqaev óz Joldaýynda basym baǵyttardyń biri retinde memlekettik organdardyń turǵyndarmen tıimdi baılanysyn atap kórsetti. Bizdiń vedomstvoda kórsetiletin memlekettik qyzmetterdiń sapasyn arttyrýda únemi jumystar júrgiziledi. Sonyń biri – jumysty tsıfrlyq formatqa kóshirý. Bul – jumysty jyldamdatyp, qoljetimdilikti arttyrady jáne sybaılas jemqorlyqqa jol berilmeıdi», - deıdi SQO PD bastyǵynyń birinshi orynbasary Dýman Taev.