SQO-da Ortalyq Azııada teńdesi joq et kombınaty iske qosyldy
PETROPAVL. QazAqparat - SQO Taıynsha aýdanynyń Novoıvanovka eldimekeninde ónimi eksportqa baǵyttalǵan zamanaýı et kombınaty paıdalanýǵa berildi, dep habarlaıdy QazAqparat tilshisi.
Kásiporynnyń jumysymen SQO ákimi Qumar Aqsaqalov tanysty.
Kombınat etti tereń óńdeıdi. Kásiporynnyń shıkizat qýattylyǵy - 5 myń tonna et. 3 myń tonna daıyn ónim shyǵarady. Bul - shujyq ónimderi jáne jartylaı fabrıkattar. Daıyn ónim eksportqa jiberiledi.
«Bul kásiporynnyń Ortalyq Azııada balamasy joq. Investıtsııa kólemi - 5 mlrd tg. Kásiporynda 74 jańa jumys orny ashyldy, barlyǵy 100 adam jumys isteıtin bolady», - dedi Qumar Aqsaqalov.
Et kombınaty nemis tehnologııasy boıynsha salynǵan. Birneshe tseh jumys isteıdi. Jýyrda úlken shoshqa kesheni de ashyldy. 50 myń malǵa shaqtalǵan. Qazir keshende 92 adam eńbektenýde. Jýyrda dál osyndaı taǵy bir keshenniń qurylysy bastalady.
«Bolashaqty josparlaı otyryp jumys isteımiz. 2020 jyly shoshqa keshenindegi maldy 100 myńǵa jetkizbekshimiz. Sondaı-aq, ózimizdiń jemazyq zaýytyn salamyz. Halyqaralyq bıoqaýipsizdik jáne álemdik aýylsharýashylyǵy talaptaryna saı keshendi ári qaraı úlkeıtetin bolamyz. Jospar boıynsha aýyl sharýashylyǵy salasyn dándi daqyldardy ósirýden bastap, otandyq ónim et pen et ónimderin dúken sórelerine jetkizýge deıin keshendi damytamyz. Bul óńirdiń kóptegen máselelerin sheshedi», - deıdi «EMC Agro» JShS dırektory Qanat Ateıbekov.
Byltyr Taıynsha aýdanynda «Bio Operations» zaýyty iske qosyldy. Nysanda qazir 450 adam jumys isteıdi. Biregeı kásiporyn krahmal men kilegeı shyǵarady. Al bıoetanoldyń alǵashqy partııasyn jyl sońynda shyǵarmaq. Barlyǵy úsh kásiporynda 600-den asa jańa jumys orny ashyldy. Bul kásiporyndar óńir ekonomıkasynyń damýyna zor septigin tıgizbek.
