SQO-da órt jıilep ketti. Qoqys jaqqandarǵa aıyppul salynýda
PETROPAVL. QazAqparat – Petropavlda órt shyǵý jıiledi. Keshe órtengen qamystyń saldarynan 6 kólik janyp, 4-ýi zaqymdanǵan. Búgin órt sóndirýshiler Hrom zaýyty kentindegi tilsiz jaýmen alysyp jatyr, dep habarlaıdy QazAqparat tilshisi.
Áleýmettik jelide Hrom zaýyty kenti mańynda shyqqan órttiń beınejazbasy tarady. Bul joly da qamys órtengen. Qazirgi ýaqytta oqıǵa ornynda órt sóndirýshiler jumys istep jatyr.
SQO Tótenshe jaǵdaılar departamenti basqarmasynyń bastyǵy Dmıtrıı Rastıhınniń aıtýynsha, 4 sáýirden bastap SQO-da órt qaýipti maýsym bastaldy. Osy aralyqtan beri qýraǵan shóp, qamys janǵan 250 shaqty órt tirkelgen. Úsh orman órti boldy.
«Óńirde jaǵdaı ýshyqqan. 12 sáýir kúni Zarechnyı kentindegi saıajaı kooperatıvterinde úlken órt tirkeldi.
Keshe Severnyı 1B mekenjaıy boıynsha qamys órtenip, jeldiń saldarynan jalyn sol mańdaǵy aıyppul turaǵyna aýysty. Kólikter bir-birine óte jaqyn turǵan. Saldarynan 6 kólik janyp ketti, taǵy tórteýi zaqymdandy.
Ol qamys ósken batpaqty jer, jol joq, órt shyqqan aýmaqqa jetý qıyndyq týdyrdy. Mamandar jaıaýlap-jalpylap, jumys istedi. Temirjolmen júrýge týra keldi. Jaqyn mańda ornalasqan munaı bazasyna qaýip tóndi. Jalynnyń jolyn bógep, taralýyna jol bermedik. Eń bastysy adam shyǵyny joq», - deıdi Dmıtrıı Rastıhın.
15 ga aýmaqqa jaıylǵan órtti mamandar 3 saǵattan astam ýaqyt sóndirdi. Búginde órt sóndirýshilerdiń jumysy qaýyrt. Ótken táýlikte oblysta 12 órt tirkeldi, buǵan qosa mamandar 46 shaqyrtýǵa bardy. Jalpy alǵanda 60 ga-dan astam jer órtendi.
«Bıyl kóktem erte shyqty, ári qurǵaq. Jańbyr jaýǵan joq. Úlken órt bolǵan saıajaı ýchaskeleri sońǵy jeti jyl boıy bul ýaqytta sý astynda turatyn. Ýchaskelerdiń kópshiligi ıesiz jatqan. Órt saldarynan «Renet» jáne «Kırovets-3» saıajaı qoǵamdastyqtarynda 201 túrli qurylys – monsha, úı-jaı, dárethana, qora-qopsy janyp ketti. Olardyń 120-sy ıesiz bos jatqan.
Osyǵan oraı óńir turǵyndaryn eskertkim keledi, ormanda bolsyn, úı mańynda, qaıda bolmasyn ot jaǵýǵa tyıym salynǵan», - deıdi basqarma bastyǵy.
Qazirgi ýaqytta oblysta 30 shaqty mobıldi top qurylǵan. Oǵan polıtseıler, jergilikti atqarýshy bılik ókilderi, ormanshylar men qutqarýshylar kirgen. Dmıtrıı Rastıhınniń aıtýynsha, osy kúnge deıin órt qaýipsizdigin saqtamaǵandarǵa 30-dan astam aıyppul salyndy. Aıyppul mólsheri 10 AEK-ten 2 myń AEK-ke deıin.
