SQO-da órt sóndirýshi jumystan bos ýaqytta balalarǵa dombyra úıretip júr
PETROPAVL. KAZINFORM – Soltústik Qazaqstan oblysynyń turǵyny Marat Sahatov órt sóndirýshi men mýzyka muǵalimi mamandyǵyn qatar alyp júr. Negizgi jumysynan bos ýaqytta balalarǵa dombyra úıretedi, ansambl de qurǵan. Shákirtteri túrli baıqaýlarda oryn alyp júr.
Sergeevka qalasynyń turǵyny Marat Sahatovtyń negizgi mamandyǵy mýzykant. Ol ulttyq aspap – dombyrada oınaıdy, fortepıano men baıandy da meńgergen.
«Bala kezimde dombyra únin estigende erekshe kúı keship, tapjylmastan otyryp tyńdaıtynmyn. Muny baıqaǵan ata-anam meni osyndaǵy mýzyka mektebine berdi. Áke-sheshem ónerge joq, biraq qyzyǵýshylyǵymdy baıqap, maǵan qoldaý kórsetti», - deıdi Marat Sahıtov.
Keıin bilimin Petropavldaǵy joǵary oqý ornynda jalǵastyryp, mýzyka pániniń muǵalimi mamandyǵyn alyp shyǵady. Alaıda toqsanynshy jyly basqa salaǵa ketýine týra kelgen. Qazir Sergeevka qalasyndaǵy №6 órt sóndirý bóliminde júrgizýshi.
«Ónerden múldem qol úzip kete almadym. Órt sóndirý bólimindegi jumystan bos ýaqytym bolady. Sondyqtan 2003 jyldan bastap ulttyq muramyz dombyrany balalarǵa úıretý maqsatynda «Óner» mektebine de ornalastym. 9-14 jas aralyǵyndaǵy mektep oqýshylaryna ulttyq aspapty úıretip jatyrmyn», - deıdi Marat Sahıtov.
«Jas tolqyn» atty dombyrashylar ansamblin de qurǵan. Ónerli balalar ustazdarynyń úmitin aqtap, túrli baıqaýlarda jeńiske jetti. Merekelerde de jas dombyrashylar sahna tórinen kórinip, sánin keltirip júr.
«20 jasymnan bastap balalarǵa dombyra tartýdy úıretip kelemin. Osy jyldar ishinde men óz bilgenimdi kóptegen talantty oqýshyǵa jetkize aldym dep oılaımyn. Shákirtterimniń tabandylyǵy men eńbegimniń nátıjesin kórý úlken qýanysh. Bul maǵan shabyt beredi», - deıdi marat Sahıtov.
