SQO-da órt sóndirýshilerdiń avtoparki jańa kóliktermen tolyqty

PETROPAVL. QazAqparat – Soltústik Qazaqstan oblysynda el Táýelsizdiginiń 30 jyldyǵyna oraı órt sóndirý qyzmetiniń avtoparki jańa 8 arnaıy kólikpen tolyqty, dep habarlaıdy QazAqparat tilshisi.

Búgin Petropavlda SQO tótenshe jaǵdaılar departamentine óńir basshysy Qumar Aqsaqalov 8 órt sóndirý kóliginiń kiltin saltanatty túrde tabys etti. Vedomstvonyń baspasóz qyzmetiniń málimetinshe, mashınalar «Ónerkásipti damytý qory» AQ qoldaýymen qarjylyq lızıng jobasy aıasynda 4 jylǵa alyndy. Jobanyń jalpy quny 579 mln teńgeden asady.

SQO TJD basshysy Ramıl Kamalovtyń aıtýynsha, jergilikti atqarýshy bılik tarapynan qarjylaı qoldaý bar, tek sońǵy 4 jylda órt sóndirýshiler men qutqarýshylarǵa jergilikti bıýdjet esebinen 29 tehnıka satyp alyndy. Olardyń ishinde jol talǵamaıtyn kólikter de, jedel-qutqarý avtomobılderi de bar.

Jańadan berilgen 8 órt sóndirý tehnıkasynyń jeteýi aýdandarǵa jiberiledi. Arnaıy kólik júrgizýshileriniń aıtýynsha, jańalary eski úsh mashınany aýystyra alady. Olar basqarýǵa jeńil, ótimdiligi joǵary jáne tsısternalarynyń kólemi úlken. Buryn 2 tonnalyq bolsa, qazir kólikter 6-8 tonnalyq.

«Kólikterdi barlyq jaǵdaıdy baǵamdaı kele, órt jıi tirkeletin, halyq sany kóp, ekonomıkalyq nysandar tyǵyz ornalasqan aýdandarǵa jiberemiz. Olar Qyzyljar, Taıynsha jáne Maǵjan Jumabaev aýdandary. Bireýi Petropavlda qalady», - deıdi Ramıl Kamalov.

Bıyl SQO-da órt sóndirýshiler 626 órtti sóndirip, 187 mln teńgeniń dúnıe-múlkin aman alyp qaldy. 42 adamnyń ómirine arasha tústi.