SQO-da órt sóndirýshiler tabıǵı park aýmaǵyn aman alyp qaldy
PETROPAVL. QazAqparat – Soltústik Qazaqstan oblysynda kepken shóp órtenip, 100 ga aýmaq janyp ketti, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 11 shilde kúni saǵat 12.47 mınýt ketkende 101 nómirine Aıyrtaý aýdany Imantaý aýylyna 5 km jetpeı kepken shóptiń órtengeni jóninde habarlama túsedi.
Ot jaqyn mańdaǵy Qaraýyltóbe orman sharýashylyǵynyń aýmaǵyna da kirip, qaıyń-qaraǵaı jana bastaǵan.
Jalynmen kúreske jedel túrde SQO TJD qurylymdary: jeke quramnan 114 adam, 16 tehnıka jáne tikushaq jumyldyryldy.
Kómekke «Kókshetaý» memlekettik ulttyq tabıǵı parktiń Aryqbalyq, Shalqar fılıaldary, jergilikti sharýashylyqtar men turǵyndar keldi.
Jedel túrde áreket etýdiń arqasynda órt ári qaraı tabıǵı park aýmaǵyna taralmaı, sóndirildi. Mamandar onymen bes saǵat kúresti.
Zardap shekkender men qaza tapqandar joq. Órttiń shyǵý sebebi anyqtalyp jatyr. Aldyn ala esep boıynsha 100 ga jer janyp ketti.
