SQO-da órt shyǵý qaýpi joǵary 4 myńnan astam turǵyn úı bar

PETROPAVL. QazAqparat – Soltústik Qazaqstan oblysynda bolatyn órtterdiń 72 %-y jeke sektorda tirkeledi. Órttiń aldyn alý maqsatynda reıdke shyqqan mamandar 2 myńǵa jýyq úıden 2 800-den astam órt qaýipsizdigi talabyn buzý jaǵdaıyn anyqtady, dep habarlaıdy QazAqparat tilshisi.

SQO tótenshe jaǵdaılar departamentiniń málimetinshe, bıyl 596 órt tirkelse, sonyń 427-si, ıaǵnı 72 %-y jeke sektorda bolǵan. Órt negizinen elektr jabdyqtaryn montajdaý jáne tehnıkalyq paıdalaný erejelerin buzýdan, peshti durys salmaýdan nemese paıdalanbaýdan jáne otty abaısyz qoldanýdan shyqqan.

«Jylytý maýsymy bastalǵaly 26 myń turǵyn úıdi araladyq. Ásirese halyqtyń áleýmettik osal toptaryna, kóp balaly otbasylar men jalǵyzilikti qarttarǵa, múgedekterge erekshe kóńil bólinedi. Qazir bizdiń esebimizde 12 124 adam, sonyń ishinde 6596 bala turatyn 4220 jeke turǵyn úı bar. 1952 úıde 3 myńǵa jýyq órt qaýipsizdigi erejelerin buzý deregi tirkeldi. Olarǵa ýaqyt berip, qaıta teksergende, 1321 úıdiń áli de olqylyqtardy joımaǵany anyqtaldy», - deıdi SQO TJD basshysynyń orynbasary Oral Ábdirahmanov.

2019 jyldan bastap kómekke muqtaj jandardyń baspanalaryna 1364 ýly gaz jáne tútin qurylǵysy ornatylǵan.

«Bul qurylǵylardyń kómegi bar. Byltyr qańtar aıynda Petropavlda kópbalaly otbasyn qutqardyq. Ekinshi oqıǵa osy jyldyń shilde aıynda Ǵabıt Músirepov atyndaǵy aýdanda boldy. Datchık 1937 jyly týǵan zeınetkerdiń úıinde iske qosylyp, qarııa ıis tııýden aman qaldy. Sondyqtan turǵyndardy úılerine ózdiginen osyndaı qurylǵylardy ornatýǵa shaqyramyz», - deıdi Oral Ábdirahmanov.