SQO-da órt azaıǵanymen, mert bolǵandar sany shamamen eki ese ósken
PETROPAVL. KAZINFORM — Soltústik Qazaqstan oblysynda jyl basynan beri órt saldarynan 24 adam kóz jumdy.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oblysta jyl basynan beri 271 órt tirkeldi. Bul byltyrǵy osy kezeńmen salystyrǵanda 9% az. Alaıda órtten mert bolǵandar sany 41% joǵary. Taǵy 15 adam jaraqat alǵan.
Sondaı-aq, byltyr 13 adam, al bıyl alty adam kómirtegi totyǵynan ýlanyp, jaraqat alǵan, biraq adam ólimi tirkelgen joq.
— Jeke turǵyn úı sektorynda órttiń basym bóligi jylytý maýsymy kezinde shyǵady. Ótken 2025-2026 jylǵy jylytý kezeńinde osyndaı 214 órt bolyp, 31 adam kóz jumdy, onyń ishinde úsh bala bar. Taǵy toǵyz adam jaraqat aldy. Órt saldarynan kelgen materıaldyq shyǵyn 52 mln teńgeden asty.
Jylytý maýsymyndaǵy órtterdiń negizgi sebepteriniń biri — peshterdi ornatý jáne paıdalaný kezinde órt qaýipsizdigi talaptaryn buzý. Buǵan qosa elektr jabdyqtaryn montajdaý jáne paıdalaný erejelerin saqtamaý, — deıdi SQO TJD basqarmasy bastyǵynyń orynbasary Aıan Qusaıynov.
SQO-da qazir órt qaýipsizdigi aılyǵynyń birinshi kezeńi ótip jatyr, ol 15 qyrkúıekke deıin sozylady. Negizgi maqsaty — ásirese áleýmettik osal toptarǵa jatatyn azamattardyń úılerindegi órt qaýipsizdigin qamtamasyz etý jáne turǵyndarmen qajetti túsindirý jumystaryn júrgizý.
Qazir departament esebinde 5 357 úı bar. Onda jalpy 19,5 myń adam, onyń ishinde 11 myńǵa jýyq bala turady.
— Aılyq bastalǵaly jergilikti atqarýshy organdar jáne polıtsııa ókilderimen birge 1 250-ge jýyq úıdi araladyq. Onyń 519-ynda órt qaýipsizdigi talaptary buzylmaǵan. Al qalǵanynan 710 zańbuzýshylyq anyqtaldy. Onyń ishinde 356-sy jylytý júıesine, 299-y elektr jabdyqtaryna, taǵy 55-i basqa talaptarǵa qatysty, — deıdi Aıan Qusaıynov.
Sonymen qatar 1 maýsymnan beri oblysta 141 avtonomdy órt habarlaǵyshy ornatylǵan. Onyń 137-si kómirtegi totyǵyn, tórteýi tútindi anyqtaıdy. Ótken jylytý kezeńinde órt habarlaǵyshtary eki ret iske qosylyp, sonyń arqasynda toǵyz adamnyń, onyń ishinde bes balanyń ómirin saqtap qalý múmkin boldy.
Mamandar turǵyndarǵa jylytý maýsymy bastalmaı turyp peshterdi daıyndap, olardy órt qaýipsizdigi talaptaryna saı kúıge keltirýdi eskertedi. Peshtegi jaryqtardy bitep, ákteý, onyń aldyna arnaıy metall qańyltyr ornatý jáne tútin murjalaryn tazalaý qajet.
Buǵan deıin Ulttyq ulan áskerı qyzmetshisi órtenip jatqan úıge kirip, eki balany qutqaryp qalǵanyn jazǵan edik.
