SQO-da ormanshylar benzınniń lıtrin 16 myń teńgeden satyp almaq bolǵan

PETROPAVL. QazAqparat – Soltústik Qazaqstan oblysynda orman sharýashylyǵy memlekettik mekemesi memlekettik satyp alý arqyly AI-92 benzıniniń lıtrin 16 696 teńgeden satyp almaq bolǵan, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttigi SQO boıynsha departamentiniń basshysy Sergeı Perovtyń aıtýynsha, vedomstvo memlekettik satyp alý júıesine kúndelikti monıtorıng júrgizedi. Negizgi mindet - josparlaý kezeńinde taýardyń qunyn jasandy túrde kóterýge jol bermeý. Profılaktıkalyq jumys bıýdjet qarajatyn únemdeýge jáne tıimdi paıdalanýǵa múmkindik beredi.

«Jyl basynan beri josparlanǵan satyp alý baǵasyn asyra baǵalaýdyń 63 faktisi anyqtaldy. Memlekettik organdardyń 34-i bizdiń aralasýymyzdan keıin baǵany tómendetý jóninde shara qabyldady. Nátıjesinde jalpy somasy 1,4 mlrd teńge únemdeldi», - deıdi Sergeı Perov.

Departament basshysynyń aıtýynsha, «Aqan seri» orman sharýashylyǵy» KMM AI-92 markaly benzınniń lıtrin 16 696 teńgege satyp almaq bolǵan. Nátıjesinde 664,5 mln teńge bıýdjet qarajatyn utymsyz paıdalanýǵa jol berilmedi.

«Aıyrtaý aýdanynyń bilim bólimi jylytý qazandyqtarynyń bir danasyn 30,7 mln teńgeden, jalpy somasy 307,6 mln teńgege satyp alýdy josparlaǵan. Sybaılas jemqorlyqqa qarsy qyzmet aralasqannan keıin memlekettik satyp alý jospary ózgertildi, únemdeý somasy 279,3 mln teńge», - deıdi Sergeı Perov.

Jambyl aýdany Presnovka aýyldyq okrýgi ákimi apparaty 7,5 mln teńgege oryndyq satyp almaq bolǵan. Nátıjesinde 6,7 mln teńge únemdeldi.