SQO-da ormandy zańsyz kesýden qorǵaýda jańa tehnologııalar qoldanylady
PETROPAVL. QazAqparat – Soltústik Qazaqstan oblysynda ormandarǵa ǵaryshtyq monıtorıng júrgizilip keledi. Bul aǵashty zańsyz kesýden qorǵaıdy, dep habarlaıdy QazAqparat tilshisi.
SQO tabıǵı resýrstar jáne tabıǵat paıdalanýdy retteý basqarmasynyń málimetinshe, QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti «Qazaqstan Ǵarysh Sapary» UK» AQ kompanııasymen úzdiksiz ǵaryshtyq monıtorıng arqyly ormandardy paıdalanýdy jyl boıy baqylaýdyń kóp deńgeıli júıesin qurdy. Maqsat - ormandardy zańsyz kesýden, orman órtterinen jáne órtterden, tabıǵat qorǵaý zańnamasyn basqa da zańbuzýshylyqtardan qorǵaý.
Monıtorıng memlekettik orman sharýashylyqtarynyń, ormanshylyqtyń, telimniń, alańnyń ornyn jáne kesilgen aǵashtyń kólemin jedel túrde kórsete alady. Tek ol úshin memlekettik orman sharýashylyqtary komıtetke-ýákiletti organǵa aǵashy kesilýge berilgen ár ýchaske boıynsha onyń zańdylyǵyn rastaıtyn qujattardyń kóshirmelerin usynady.
«Ǵaryshtyq monıtorıng is júzinde óz tıimdiligin rastady. 2020-2021 jyldary oblys boıynsha barlyq aǵashy kesýge berilgen ýchaskeler boıynsha 100 % qabyldaý uıymdastyryldy, 4 myńnan astam aǵash kesý oryndaryn kýálandyrý aktileri jasaldy.
2021 jyly aǵash kesýge 518 ruqsat qujaty berildi. Bıyl ýákiletti organ eki ret 37 aǵash kesý oryndarynda otyn daıyndaý zańdylyǵy boıynsha aqparat surady. Barlyq ýchaskelerge ormanshylar baryp tekserdi jáne qoldaryndaǵy qujattardyń zańdylyǵyna qujattyq tekserý júrgizildi, zańbuzýshylyqtar anyqtalǵan joq», - deıdi basqarmanyń mamany Sáýle Súleımenova.
Bıyl oblysta 869 gektar alqapta aǵash otyrǵyzyldy. Jyl saıyn memlekettik orman sharýashylyqtary otyn daıyndaý jumystarynan keıin 6 myń gektardan astam alqapty tazalaıdy.
Jalpy bıyl memlekettik orman qory aýmaǵynda zańsyz aǵash kesýdiń 10 jaǵdaıy anyqtaldy. Jalpy kólemi - 121 tekshe metr, keltirilgen shyǵyn 489 myń teńge. 7 hattama toltyryldy, zańbuzýshylardan 90 tekshe metr zańsyz kesilgen aǵash, 4 benzın arasy tárkilenip, 7 is sotqa berilip, qaraldy. Kinálilerge 1 mln teńgeden astam ákimshilik aıyppuldar salyndy, sondaı-aq olar 435,5 myń teńge somasynda keltirgen zalaldyń ornyn toltyrady.
