SQO-da ormandy otaǵan turǵyn 40 táýlikke qamalýy múmkin
PETROPAVL. QazAqparat - Soltústik Qazaqstan oblysynda «Brakoner» atty jedel-profılaktıkalyq is-sharasy aıaqtalyp, 100-den astam zań buzýshylyq anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Maǵjan Jumabaev aýdanynda ormandy zańsyz otaǵany úshin Býlaev qalasynyń 32 jastaǵy turǵyny ustaldy. Ol Medvejka aýylynyń mańynda 304 qaıyń men 47 terekti tıisti qujattarsyz kesken. Tabıǵatqa kelgen shyǵyn - 270 myń teńge shamasynda. Er adam endi 40 táýlikke deıin bas bostandyǵynan aıyrylýy nemese 400 myń teńge kóleminde aıyppul tóleýi múmkin. Sondaı-aq ol shyǵynnyń ornyn toltyrýy tıis.
«Qostanaı oblysynyń eki turǵynyna da aıyppul salynýy múmkin. Olar Tımırıazev aýdanynda 300 kelideı zańsyz balyq aýlaǵan. Operatsııa barysynda zańsyz balyq aýlaǵan 27 adamdy anyqtadyq, olar ákimshilik jaýapkershilikke tartylady», - SQO PD JPQB tabıǵatty qorǵaý polıtsııasynyń aǵa ınspektory Sergeı Lıpko.
«Brakoner» jedel-profılaktıkalyq is-sharasynyń bes kúninde tabıǵatty qorǵaý zańnamasyn buzǵan 117 derek anyqtaldy. Sondaı aq tártip saqshylary qazirgi ýaqytta ań men qus aýlaýǵa tyıym salynǵanyn eskertedi. Al balyqty ruqsat alǵan jaǵdaıda ǵana aýlaýǵa bolady.
