SQO-da ormandy órtten qorǵaý úshin bıýdjetten 342 mln teńge qarajat bólindi
PETROPAVL. KAZINFORM – Soltústik Qazaqstan oblysynda prokýratýra tekserisinen keıin ormandardy órtten qorǵaý boıynsha birqatar shara qabyldandy.
Júrgizilgen taldaý nátıjesinde oblystyń mamandandyrylǵan tabıǵatty qorǵaý prokýratýrasy jergilikti atqarýshy organdardyń qyzmetinde orman zańnamasynyń buzý faktilerin anyqtady.
SQO prokýratýrasynyń málimetinshe, qazirgi qoldanystaǵy orman órt sóndirý stantsııalary QR Aýyl sharýashylyǵy mınıstrligi buıryǵynyń talaptaryna sáıkes kelmeıdi, órt sóndirý stantsııalarynyń materıaldyq-tehnıkalyq jaraqtandyrylýy jetkiliksiz, onyń ishinde órt sóndirýshilerdi ornalastyrýǵa arnalǵan úı-jaılar, jyly garajdar, mamandar, sondaı-aq órt sóndirý tehnıkasyna arnalǵan qajetti jaraqtandyrýlar men jabdyqtar joq.
Oblystaǵy barlyq orman mekemelerinde orman órtterin erte tanýdyń avtomatty júıesi – «FireWatch» joq, arnaıy jedel áreket etý avıatsııasyn satyp alý jáne orman órtterin sóndirý, jetýge qıyn jerlerde desanttyń qonýyn qamtamasyz etý úshin tikushaq alańdaryn ornatý boıynsha usynystar berilmegen.
Sý alýǵa arnalǵan órt gıdranttary men sý aıdyndarynyń jaı-kúıi máz emes, mıneraldanǵan qorǵanysh jolaqtaryn salýda zań buzýshylyqtar bar. Halyq evakýatsııalaý josparymen tanys emes, órtke qarsy erikti quralymdar qurý boıynsha túsindirý jumystary jetkiliksiz júrgizilgen.
Prokýrorlyq qadaǵalaý aktisi boıynsha oblystyq bıýdjetten arnaıy órt tehnıkasy men jabdyqtaryn satyp alýǵa 296,6 mln teńge, 7 orman sharýashylyǵyna órtti erte anyqtaý qurylǵylaryn satyp alýǵa 45 mln teńge bólindi, 12 laýazymdy tulǵa tártiptik jaýapkershilikke tartyldy, onyń ishinde úsh aýdan ákimi bar.
Sondaı-aq, «Ónerkásipti damytý qory» AQ arqyly 3,3 mlrd teńge somasyna órtke qarsy tehnıkany satyp alý úshin lızıng berý máselesi sheshilip jatyr, bul orman ıelerin qoldanystaǵy normalar men normatıvter boıynsha órt mashınalarymen jáne traktorlarmen 100% qamtamasyz etýge múmkindik beredi.
Petropavlda órtengen turǵyn úıden úsh adamnyń denesi tabylǵandyǵyn jazǵan edik.
