SQO-da ormandardy qorǵaý sharalary qorytyndylandy
PETROPAVL. QazAqparat – Soltústik Qazaqstan oblysynda tabıǵı resýrstar jáne tabıǵat paıdalanýdy retteý basqarmasynda ormandardy qorǵaý sharalarynyń nátıjesi qorytyndylandy, dep habarlaıdy QazAqparat tilshisi.
Vedomstvonyń málimetinshe, Soltústik Qazaqstandaǵy ormandardyń jalpy sanıtarlyq jaǵdaıy qanaǵattanarlyqtaı. Soǵan qaramastan, ótken jyldardaǵy orman órtteriniń saldarynan ólgen, búlingen, sý basqan jáne keselge ushyraǵan kóshetter de barshylyq.
Bıyl orman zııankesteriniń oshaǵy anyqtalǵan joq. Jumyrtqa salǵyshtar boıynsha - jupsyz jibek qurtynyń karantındik zııankesteriniń oshaǵyn anyqtaý úshin orman patologııalyq zertteýi júrgizildi. Mamandar tekserý nátıjesinde orman zııankesteriniń 2020 jyly shyǵýy múmkin ekenin anyqtady.
2014 jyldan bastap jaýyn-shashynnyń tolassyz túsýinen jerasty sýlary kóterilip, keıbir jerlerde orman aǵashtary men qaıyń-kókterek kóshetteri kógermeı, ólip qalǵan. Osyndaı ormandardy tekserý úshin Respýblıkalyq orman selektsııalyq-tuqym sharýashylyǵy ortalyǵy men Qazaq orman sharýashylyǵy ǵylymı-zertteý ınstıtýtynyń mamandary shaqyryldy. 15091 gektar orman alqabyn sý basqany anyqtaldy. Olardyń barlyǵy baqylaýǵa alyndy.
«Sokolovka orman sharýashylyǵy» QMK memlekettik orman qory aýmaǵynda 184 gektar alqapta jerústi bıologııalyq kúres sharalary júrgizildi. Onyń ishinde 25 qusqa arnap jasandy uıalar ilinip, 25 qumyrsqa ıleýi jasaldy», - dedi basqarmadan.
Mamandar tekserý nátıjesi boıynsha 2020 jylǵa sanıtarlyq-saýyqtyrý sharalary qajet ekenin josparlady.
