SQO-da orman sharýashylyǵynyń basshysy qyzmetshilerin para alýǵa úıretken
Sybaılas jemqorlyqqa qarsy is-qımyl ulttyq bıýrosy departamentiniń basshysy Asqat Jumaǵalı óńirdegi jaǵdaıdy baıandady. Onyń aıtýynsha, tórt aıdyń ishinde 72 qylmys tirkelip, jemqorlyqqa qatysy bolýy múmkin 35 adam anyqtaldy.
Sybaılas jemqorlyq faktileri túrli salalarda anyqtalǵan. Sonyń ishinde sýmen qamtý da bar. «Óńirlerdi damytý» baǵdarlamasy aıasynda SQO-da sońǵy úsh jylda sýmen qamtamasyz etýdiń 39 jobasy júzege asyrylyp jatyr. Bólingen 7 mlrd teńgeniń jartysyna jýyǵy ıgerildi.
Sońǵy 5 jylda osy salada 13 zańbuzýshylyq anyqtalǵan.
«Sybaılas jemqorlyqqa qarsy qyzmet QR AShM Sý resýrstary komıteti oblystyq fılıalynyń basshysyn ustady. Fılıaldyń negizgi mindeti - sýarýǵa arnalǵan jáne taza aýyzsýmen qamtý. Balansynda 3 gıdrotorap bar. Óńirde 649 eldi meken bolsa, sonyń 60% taza sýmen qamtylǵan. Al gıdroqondyrǵylar tutynýshylarǵa jylyna 400 mln tekshe metr sý bere alady. Іs júzinde - 10%. Eńbek etken jyldary fılıal basshysy óńirdi sýmen qamtýdy jaqsartýǵa qatysty birde-bir usynys bildirmegen», - dedi Asqat Jumaǵalı.
Departament basshysynyń aıtýynsha, fılıal basshysy óziniń tikeleı mindetin oryndaýdyń ornyna, qaramaǵyndaǵy qyzmetkerlerden aqsha alyp kelgen, jalǵan issaparlar men memlekettik satyp alýlar arqyly bıýdjet qarjysyn jymqyrǵan. Kúdikti alǵan aqshalaryn dollarǵa aıyrbastap otyrǵan. Ol qamaýǵa alynyp, isin jaqynda sotqa joldaý josparlanǵan.
Orman sharýashylyǵy salasynda da sybaılas jemqorlyqqa jol berilgen. A.Jumaǵalıdiń aıtýynsha, tabıǵat baılyǵy ońdy-soldy zańsyz satylǵan.
«Sheneýnikter kásipkerlerge aǵash kesýge para bermeıinshe oryn bólmegen. Bul týraly telefon arqyly sóılesken sózderi bar. Oblystyń orman sharýashylyqtarynyń biriniń basshysy ustaldy. Ol ormanshylar men óziniń orynbasary arqyly para alyp kelgen. Kúdikti jumysshylaryna parany qalaı alý kerektigin túsindirgen. Ol birneshe ret jáne úlken kólemde para alǵany úshin qylmystyq jaýapkershilikke tartylady. Para bergen adam jazasyn ótep jatyr», - dedi ol.
Ulttyq bıýro departamenti basshysynyń aıtýynsha, bir aı óter-ótpes kórshi orman sharýashylyǵynyń jetekshisi ustaldy. Oǵan da aǵashty kesýge ruqsat bergeni úshin ormanshy arqyly para alyp keldi degen aıyp taǵyldy. Osy oqıǵaǵa qatystylardyń barlyǵy qylmystyq jaýapkershilikke tartylýda. Tergeý áli aıaqtalǵan joq.
«Osy máseleden keıin biz orman sharýashylyǵyndaǵy jaǵdaıdy anyqtaý úshin keshendi tekseris ótkizemiz. Birneshe buzýshylyqtar anyqtaldy. Nátıjesimen keıin tanystyramyz. Bolashaqta ortalyqtan mamandardy tartý arqyly óńirdegi barlyq orman sharýashylyqtaryn tekserýdi josparlap otyrmyz», - dedi A.Jumaǵalı.
Aýyl sharýashylyǵy salasynda sońǵy 5 jylda - urlyq, para alý jáne laýazymyn asyra paıdalaný boıynsha 24 qylmys tirkelgen. Memleketke kelgen shyǵyn kólemi - 500 mln teńge kóleminde. Onyń 75% qaıtaryldy.