SQO-da orman órti eki ese jıilep, bıyl 700 ga astam alqap janyp ketti

PETROPAVL. QazAqparat – Soltústik Qazaqstan oblysynda jyl bastalǵaly 726 ga aýmaqta 22 orman órti tirkeldi, bul ótken jyldyń uqsas kezeńimen salystyrǵanda 60%-ǵa kóp, dep habarlaıdy QazAqparat tilshisi.

SQO Tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, óńirde jyl bastalǵaly 316 órt tirkelgen. 27 adam, sonyń ishinde 2 bala mert boldy. Taǵy 5 adam jaraqattansa, 13 adam ıis tıip ýlanǵan. Al, materıaldyq shyǵyn - 266 mln teńge.

«Órttiń basym bóligi – 77%-y jeke turǵyn úı sektorynda bolǵan. Peshti durys qoldanbaý, elektr qondyrǵylaryn ornatý, tehnıkalyq paıdalaný erejelerin saqtamaý jáne otty abaılamaı jaǵýdan. Bıyl maýsym bastalǵaly orman órti kóbeıgen. Byltyr osy ýaqytqa deıin 31,7 ga ormandy alqapta 14 órt tirkelse, bıyl 22 órt shyqty, 725,8 ga alqap zaqymdandy, ıaǵnı 23 ese ósken. Kinálilerdi anyqtaý úshin materıaldar polıtsııa departamentiniń bólimshelerine berildi», - deıdi Dmıtrıı Rastıhın.

Dala órti de jıi shyǵatyn bolǵan. Byltyr 34 tirkelse, bıyl mamandar 45 ret órt sóndirýge barǵan.

«Oblys boıynsha 50 órt sóndirý beketi quryldy. Olar 38 myń turǵyny bar 150 eldi mekendi órtten qorǵap otyr. Budan basqa 400-den astam erikti órtke qarsy qurylymdar bar. Olardyń kómegimen bıyl 28 dala órti der kezinde sóndirildi. Al, 4 órtti osyndaı qurylymdar ózderi sóndirip aldy», - deıdi vedomstvo basshysynyń orynbasary.

Órt shyǵý qaýpi joǵary aımaqtardy baqylaýda ustaý úshin SQO ákimdigi men «Qazaqstan Ǵarysh Sapary» UK» AQ 6,5 mln teńgege kelisimge otyrǵan. Jalpy, jyl bastalǵaly 408 reıd ótkizilip, 109 adam ákimshilik jaýapkershilikke tartyldy. 63-i eskertý alsa, 46 quqyq buzýshy jalpy somasy 1 mln 355 myń teńgeniń aıyppulyn tóledi.

Buǵan deıin SQO-da 25 mamyr kúni joǵalǵan er adamnyń denesi tabylǵanyn aıtqan edik.