SQO-da orman órti bes esege kóbeıdi: bıyl 24 derek tirkelgen
PETROPAVL. KAZINFORM — Soltústik Qazaqstan oblysynda byltyr 5 orman órti tirkelse, bıyl jyl bastalǵaly onyń sany 24-ke jetken.
SQO orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, ótken jyly memlekettik orman qory aýmaǵynda jalpy aýdany 10 ga alqapqa órtten zaqym kelgen. Saldarynan orman sharýashylyǵy 587 myń teńge shyǵyn shekti.
Tirkelgen bes órttiń tórteýi Tabıǵı resýrstar jáne tabıǵat paıdalanýdy retteý basqarmasynyń qaraýyndaǵy memlekettik orman qory jerlerinde bolsa, bireýi — «Kókshetaý» memlekettik ulttyq tabıǵı parkiniń fılıaly aýmaǵynda shyqqan. Munda dala órti 0,012 ga aýmaqty sharpyp úlgergen. Mamandar onyń jaıylýyna jol bermedi.
Jalpy tórteýi dala órtiniń taralýynan, bireýi naızaǵaı razrıadynan bolǵan.
Al bıyl jaǵdaı kúrdelirek. Osy kúnge deıin oblysta 24 orman órti tirkelip, zaqymdanǵan alqaptyń jalpy aýmaǵy — 63,5 ga. Saldarynan orman sharýashylyǵyna 6 mln teńgege jýyq zalal keldi.
— Bıyl orman órtiniń 13-i egistik alqaptaryna ot qoıýdan jáne dala órtinen boldy. Bes jaǵdaıda ormanǵa naızaǵaı túsken, al taǵy beseýiniń sebebi anyqtalmady. Bir jaǵdaıda órt uıymdar men kásiporyndardyń kinásinen bolǵan. Aýyl sharýashylyǵy alqaptaryn baqylaýsyz órteý máselesi ózekti. Sebebi jalyn jeldiń áserimen orman alqaptaryna taralyp, úlken aýmaqqa zalal keltirýi múmkin, — deıdi ınspektsııanyń bólim basshysy Ivan Koh.
Buǵan deıin SQO-da bıyl tabıǵat qorǵaý zańnamasyn buzýdyń 25 faktisi anyqtalǵanyn jazǵan edik.
