SQO-da óńir turǵyndary 15 medıtsınalyq uıymda ońaltýdan óte alady
PETROPAVL. KAZINFORM - Jaraqattan, kúrdeli operatsııadan nemese aýyr syrqattan keıin tolyqqandy ómirge qaıta oralý úshin ońaltý asa mańyzdy. Soltústik Qazaqstan oblysynda bıyl turǵyndarǵa shamamen 715 mln teńgeniń medıtsınalyq ońaltý kómegi kórsetildi.
Áleýmettik medıtsınalyq saqtandyrý qorynyń SQO boıynsha fılıalynyń dırektory Aınagúl Davletchınanyń aıtýynsha, bul ótken jyldyń sáıkes merzimimen salystyrǵanda 59 mln teńgege artyq.
- Jyl basynan beri oblystyń medıtsına uıymdarynda táýlik boıǵy jáne kúndizgi statsıonarlarda 1 308 patsıent ońaltýdan ótti. Bul maqsatqa 359,2 mıllıon teńge jumsaldy. Sonymen qatar ambýlatorlyq deńgeıde 142,5 myń ońaltý qyzmeti kórsetildi, - deıdi Aınagúl Davletchına.
Bıyl SQO-da medıtsınalyq qyzmet kórsetetin 46 uıymmen kelisimshart jasalǵan. Onyń ishinde 15 medıtsınalyq uıym ońaltý kómegin kórsetedi. Mundaı qyzmet tek oblys ortalyǵynda ǵana emes, aýdandarda da qoljetimdi. Taıynsha jáne Ǵabıt Músirepov atyndaǵy aýdandyq aýrýhanalarda turǵyndar qajetti ońaltý sharalaryn ala alady.
- Ońaltý birneshe kezeńnen turady. Alǵashqy kezeń aýrýdyń jiti kezeńinde nemese hırýrgııalyq aralasýdan keıin bastalyp, asqynýlardyń aldyn alýǵa jáne aǵzanyń qyzmetin qalpyna keltirýge baǵyttalady. Keıin patsıenttiń jaǵdaıyna qaraı ońaltý arnaıy bólimshelerde nemese ońaltý ortalyqtarynda jalǵasady. Úshinshi kezeńde em ambýlatorııalyq jaǵdaıda, statsıonarlarda, sanatorıılerde nemese úıde júrgizilýi múmkin, - deıdi fılıal dırektory.
MÁMS júıesi aıasynda balalardy ońaltý baǵdarlamalaryna da erekshe kóńil bólingen. 18 jasqa deıingi balalar jeńildik sanatyna kiredi.
- Jyl saıyn mindetti áleýmettik medıtsınalyq saqtandyrý júıesinde ońaltý qyzmetteriniń túrleri men kólemi keńeıip keledi. Búginde mundaı kómekti alý úshin azamattyń saqtandyrylǵan mártebesi bolýy jetkilikti. Ońaltýdan ótý úshin patsıentterge MÁMS júıesinde 12 aı boıy úzdiksiz jarna tóleýi shart nemese jeńildikti sanatqa - balalar, zeınetkerler, stýdentter, áskerı qyzmetshiler, júkti áıelder, kópbalaly analar qatarynda bolýy qajet, - deıdi Aınagúl Davletchına.
Buǵan deıin áskerı-medıtsınalyq qyzmet kórsetý erejeleri ózgergenin jazǵan edik.
