SQO-da onnan astam aıaldamany zaqymdaǵan úsh adam ustaldy
PETROPAVL. QazAqparat – Soltústik Qazaqstan oblysynda abattandyrý erejesin buzǵan 7111 adamǵa ákimshilik jaza kesildi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Omby aınalma jolynan Petropavl qalasynyń shekarasyna deıin 13 aıaldama pavılony ornatylǵan. Onyń tek ekeýi ǵana eski, qalǵandary jańa úlgide áınekten jasalǵan. Buzaqylyqtyń jáne abattandyrý erejelerin buzýdyń aldyn alý maqsatynda sol aýmaqtyń ýchaskelik ınspektorlary reıd ótkizdi. Tekseris barysynda 5 aıaldama pavılonyna zaqym kelgeni anyqtaldy. Olardyń barlyǵy saıajaı ýchaskeleriniń mańynda ornalasqan.
«Qala ortalyǵynan alys ornalasqanyna qaramastan bul jerden adamdar men kólik kóp ótedi. Borkı, Solnechnyı, Novopavlovka kentteri ornalasqan, budan basqa saıajaı ýchaskeleri, zırat bar. Halyq Esil jaǵalaýyna demalý úshin de jıi keledi. Kópshiligi artynan qoqysty jınap júrmeıdi. Saldarynan jol boıy shashylǵan turmystyq qaldyqtardy kóremiz. Osyǵan oraı qalalyq ákimdikke jol boıyna qajetinshe konteınerler qoıý jóninde jedel aqparat jiberildi», - deıdi tártip saqshylary.
Petropavl qalalyq Polıtsııa basqarmasy jergilikti polıtsııa qyzmeti bólimi bastyǵynyń orynbasary Aıdyn Aqmaǵanbetovtyń málimetinshe, qalalyq ákimdiktiń turǵyn úı-kommýnaldyq sharýashylyq bólimi aıtylǵan aýmaqtaǵy qoqysty jınatty. Qalypqa kelgen shetkeri aýdannyń endigi sanıtarlyq jaǵdaıy tikeleı turǵyndarǵa baılanysty.
Ýchaskelik ınspektorlar aldaǵy ýaqytta da usaq buzaqylyq pen abattandyrý erejelerin buzýdyń aldyn alý maqsatynda reıdter ótkizbek.
«Jyl basynan oblys ortalyǵynda 14 aıaldama pavılonyna zaqym keldi. Osy quqyq buzýshylyqtarǵa qatysy bar úsh adam ustalyp, ákimshilik jaýapkershilikke tartyldy», - deıdi Aıdyn Aqmaǵanbetov.
Jalpy, bıyl SQO-da abattandyrý erejesin buzǵan 7111 adamǵa ákimshilik shara qoldanylǵan.
