SQO-da onkologııalyq aýrýlarmen kúreske 2,8 mlrd teńge jumsalmaq
PETROPAVL. QazAqparat – Soltústik Qazaqstan oblysynda bıyl qaterli isik dertimen kúreske 2,8 mlrd teńge bólindi, dep habarlaıdy QazAqparat tilshisi.
4 aqpan – Búkilálemdik qaterli isikke qarsy kúres kúni. Onkologııalyq aýrýlar áleýmettik máni bar aýrýlardyń tizimine kiretindikten, osy sanattaǵy naýqastardy emdeý tegin medıtsınalyq kómektiń kepildik berilgen kólemi (TMKKK) sheńberinde júzege asyrylady. Bul qyzmet medıtsınalyq qyzmetter paketin satyp alatyn medıtsınalyq saqtandyrý qory esebinen qarjylandyrylady.
«Áleýmettik medıtsınalyq saqtandyrý qory» KEAQ Soltústik Qazaqstan oblystyq fılıaly baspasóz qyzmetiniń aqparaty boıynsha, 2020 jyly óńirde onkologııalyq aýrýlarǵa kómek kórsetýge, onyń ishinde sáýlelik terapııa, hımıoterapııa, onkologııalyq baǵdarlama sheńberinde kómek kórsetýge jáne onkogematologııalyq naýqastarǵa kómek kórsetýge 2,8 mlrd teńge bólindi.
Onkologııalyq aýrýlardyń basym bóligin skrınıngtik zertteýlerdiń arqasynda erte kezeńde anyqtaýǵa bolady. Mysaly, sút beziniń qaterli isigi bastapqy kezeńde anyqtalǵan jaǵdaıda naýqastardyń 94% tolyq jazylady. Emdeý shyǵyndary 200 esege qysqarady.
30 jastan bastap jyl saıyn tegin skrınıngtik tekserýden ótý qajet. Qazirgi ýaqytta qaterli isikke skrınıngtiń úsh túrin tegin ótýge bolady. 30-70 jas aralyǵyndaǵy áıelder jatyr moıny obyryna tekseriledi. 40-70 jastaǵylar mammografııalyq tekserýden ótedi. 50-den 70 jasqa deıingi erler men áıelder toq ishek jáne tik ishek obyryna tekseriledi.
Mamandardyń sózine qaraǵanda, jatyr moıny obyry áıelderde kezdesý jıiligi boıynsha ekinshi orynda tur. Eger 2018 jyly jatyr moıny obyry 51 áıelde anyqtalsa, 2019 jyly bul kórsetkish 73-ti quraǵan. Olardyń 13-inde qaterli isik erte satysynda anyqtaldy.
