SQO-da óndirilgen un ónimderi el ishindegi naryqqa shyǵýǵa daıyn
PETROPAVL. KAZINFORM — Soltústik Qazaqstan obylysynyń Taıynsha aýdanynda ornalasqan «Memolux» JShS kásiporny jaqyn ýaqytta ishki naryqty un ónimderimen qamtamasyz etýdi josparlap otyr.
Ortalyq Azııa jáne qytaılyq «Jenmın jıbao» gazeti jýrnalısteri «Bir beldeý — Bir jol» taqyrybymen ótken birlesken baspasóz týry aıasynda zaýyttyń jumysymen tanysyp qaıtty.
Kásiporyn qazirgi ýaqytta qytaılyq «Sıan Aı Tszıýı» korporatsııasymen birlesip bıdaıdy tereń óńdeý jobasyn iske asyryp jatyr.
Kásiporyn ókilderiniń tanystyrýynsha, zaýyt jylyna 200 myń tonna un jáne 300 myń tonna jemshóp uny, sonymen qatar 20 myń tonna kespe ónimderin óndiredi.
«Sıan Aı Tszıýı» korporatsııasynyń Qazaqstandaǵy bas dırektory Fan Lýnfeıdiń aıtýynsha, kásiporyn ónimderin ishki naryqqa shyǵarýdy josparlap otyr.
— Sapaly un ónimderimiz Qytaı naryǵyna eksportqa shyǵarylyp jatyr. Josparǵa sáıkes, qazaqstandyqtar kelesi aıda bizdiń ónimderimizdi tutyna alady, — dedi ol.
Qytaılyq kásiporyn basshysynyń aıtýynsha, shyǵarylǵan un ónimderine «Halal» sertıfıkatyn alýǵa ótinish berilgen.
— Qazirgi ýaqytta biz ónimderimizdiń «Halal» standarty boıynsha sertıfıkatyn alýǵa ótinish berdik. Aldaǵy ýaqytta tıisti rásimderdi aıaqtap, ishki naryqta ónimderimizdi shyǵarýdy bastaımyz, — dedi Fan Lýnfeı.
Osyǵan deıin habarlaǵanymyzdaı, Májilis depýtaty Murat Ergeshbaev Qytaıda Qazaqstan unyn satatyn ókildik qurýdy usynǵan bolatyn.
Sondaı-aq, Memleket basshysy Qasym-Jomart Toqaev Qazaqstan Italııa naryǵyna bıdaı men un eksportyn arttyrýǵa daıyn ekendigin aıtty.