SQO-da óndiristik jaraqattardyń 68% jekemenshik kompanııada bolǵan
PETROPAVL. QazAqparat – Soltústik Qazaqstan oblysynda byltyr kásiporyndar men uıymdarda 38 adam jaraqattansa, bir adam qaza tapty, dep habarlaıdy QazAqparat tilshisi.
SQO Statıstıka departamentiniń málimetinshe, jumys ornynda jaraqat alǵan 38 adamnyń 7-eýi - áıel. Eńbek etý qabiletinen ýaqytsha aıyrylǵandardyń basym bóligi - 68,4% – jekemenshik kásiporyndar men uıymdarda, 26,3% – memlekettik, 5,3% basqa memleketterdiń menshigindegi kásiporyndarda eńbek etken.
Óndiristik jaraqattan qaza tapqandardyń sany 66,7% azaıyp, 1 adamdy qurady. Mert bolǵan jumysshy jekemenshik kásiporynda eńbek etken.
«Zardap shekkenderdiń kóbi – 7 adam nemese jalpy sanynan 18,4% aýyl, orman jáne balyq sharýashylyǵynda jumys isteıtin qyzmetkerler, 6 adam - 15,8% saýdada, 5 adam - 13,2% óńdeý ónerkásibinde, 4 adam - 10,5% densaýlyq saqtaý salasynda eńbek etedi. Jazataıym oqıǵaǵa basty sebep – jaraqat alǵandardyń óreskel abaısyzdyǵy. Saldarynan 17 adam eńbek etý qabiletinen ýaqytsha aıyryldy», - delingen baspasóz habarlamasynda.
Mamandardyń aıtýynsha, kóp jaǵdaıda zardap shegýshi qulap jaraqat alady nemese olarǵa zattar, materıaldar qulap túsken. Jer opyrylyp túskennen japa shekkender bar. Osylaısha 8 adam jaraqat alǵan. Al 7 adam qozǵalatyn, shashyraıtyn, aınalatyn zattar men bólshekterdiń áserinen, taǵy 3 adamnan mekeme kóliginiń qatysýymen bolǵan jol-kólik oqıǵasynda jáne shekten tys temperatýranyń áserinen zardap shekken.
Óndiriste bolǵan jazataıym oqıǵa kezinde zardap shekkenniń ár úshinshisi – ónerkásipte, qurylysta jáne kólik salasynda jumys istegen. Sondaı-aq, byltyr biliktiligi joq 9 jumysshy jáne óndiristik qondyrǵynyń 8 operatory zardap shekti.
2019 jyly kásibı aýrýǵa tynys alý organdarynyń týberkýlezi bolyp sebep bolǵan.
Jalpy, óndiristik jaraqat alǵandardyń 36,8% - 30-45 jastaǵylar bolyp tirkelgen.
