SQO-da on aıda mas júrgizýshiler kinásinen bir adam mert bolyp, 24-i jaraqattandy
PETROPAVL. KAZINFORM — Soltústik Qazaqstan oblysynda ótken demalys kúnderi 10 mas júrgizýshi ustaldy. Endi olar 7-8 jylǵa kólik júrgizý quqyǵynan aıyrylmaq.
SQO polıtsııa departamenti baspasóz qyzmetiniń málimetinshe, ótken demalys kúnderi tártip saqshylary Petropavldaǵy ortalyq kóshelerdiń qıylysynda «VAZ-21070» avtokóligin toqtatqan. Rýlde 29 jastaǵy er adam bolǵan.
Ony teksergen kezde spırttik ishimdiktiń ıisi shyǵyp turǵan, alaıda júrgizýshi medıtsınalyq kýálandyrýdan bas tartqan.
«Tájirıbe kórsetkendeı, adamdardyń kópshiligi demalys kúnderi spırttik ishimdik iship, keshke jaqyn nemese tún ortasynda kólik tizginine otyrýdy ádetke aınaldyrǵan. Dál osy ýaqytta polıtseıler de jol-kólik oqıǵalarynyń aldyn alý jumysyn kúsheıtedi. Mas ustalǵandar ákimshilik qamaqqa alynyp, 7 jylǵa kólik júrgizý quqyǵynan aıyrylýy múmkin. Júrgizýshi medıtsınalyq kýálandyrýdan bas tartqan jaǵdaıda 15 táýlikke qamaqqa alynyp, uzaǵyraq merzim — 8 jylǵa júrgizýshi kýáliginen aıyrylady», — deıdi SQO PD jergilikti polıtsııa qyzmeti basqarmasy bastyǵynyń orynbasary Aleksandr Rozbah.
Jalpy ótken demalys kúnderi Petropavlda jáne oblys aýdandarynda 10 mas júrgizýshi anyqtaldy. Al bıylǵy 10 aıdyń ishinde mas júrgizýshilerdiń kinásinen 18 jol-kólik oqıǵasy bolyp, saldarynan 1 adam mert boldy, 24 adam jaraqat aldy.
«Kólikti mas kúıde júrgizý — jol júrisi qaǵıdalarynyń óreskel buzýshylyǵy sanalady. Mundaı faktilerdiń jolyn kesý boıynsha jumystar udaıy júrgizilip turady», — deıdi Aleksandr Rozbah.
Buǵan deıin SQO-da úsh aptada zańsyz ańshylyqtyń 100-den astam faktisi tirkelgenin jazǵan edik.
