SQO-da on kúnde órtten 3 adam qaza tapty, tórteýi kúıip qaldy
PETROPAVL. QazAqparat – Soltústik Qazaqstan oblysynda sońǵy onkúndikte 25 órt tirkeldi. 3 adam qaza taýyp, 4 turǵyn jaraqattandy, dep habarlaıdy QazAqparat tilshisi.
SQO tótenshe jaǵdaılar departamenti basqarmasy bastyǵynyń mindetin atqarýshy Aıdar Musataevtyń aıtýynsha, 4 jeltoqsan kúni Esil aýdanynyń Nıkolaevka eldi mekeninde jeke turǵyn úıden órt shyqqan.
Oqıǵa ornynan úı ıesi 81 jastaǵy áıeldiń denesi tabyldy. Aldyn ala boljam boıynsha, órttiń shyǵýyna peshti durys qoldanbaý sebep bolǵan.
Sondaı-aq Ǵabıt Músirepov atyndaǵy aýdannyń Novoselovka eldi mekeninde de jer úıde órt shyqqan.
Órt sóndirýshiler janyp ketken úıden 41 jastaǵy er adamnyń múrdesin tapty. Munda da órt peshti qoldaný talabyn buzýdan bolǵan.
«Ótken aptada 25 órt tirkeldi, onyń basym bóligi jeke sektorda boldy. 6 jeltoqsan kúni Taıynsha qalasynda gaz ballonyn qoldaný barysynda qaýipsizdik tehnıkasyn saqtamaýdan jarylys bolǵan. Arty órtke ulasyp, úıdiń 36 jastaǵy ıesi termııalyq kúıik aldy. Onyń denesiniń 60 % kúıgen. Er adam 12 jeltoqsanda aýrýhanada qaıtys boldy», - deıdi Aıdar Musataev.
Jalpy SQO-da jyl basynan beri 648 órt bolǵan, saldarynan 36 adam qaza tapty.
Taǵy 30 adam túrli dene jaraqatyn aldy. 25 adamǵa, sonyń ishinde 7 balaǵa ıis tıgen. Kelgen materıaldyq shyǵyn 426 mln teńge shamasynda.
