SQO-da ólim-jitim ortasha respýblıkalyq deńgeıden 70,2%-ǵa joǵary - DSM
ASTANA. QazAqparat – Densaýlyq saqtaý mınıstri Ajar Ǵınııat Soltústik Qazaqstan oblysynyń medıtsınalyq uıymdary basshylarymen halyqqa medıtsınalyq kómek kórsetýdiń problemalyq máseleleri boıynsha keńes ótkizdi, dep habarlaıdy QazAqparat vedomstvonyń baspasóz qyzmetine silteme jasap.
Keńes jumysyna SQO Densaýlyq saqtaý basqarmasynyń, ÁlMSQ aýmaqtyq vedomstvolyq baǵynysty uıymdarynyń, MFBKD basshylary qatysty.
«2022 jyldyń 11 aıynyń qorytyndysy boıynsha Soltústik Qazaqstan oblysynda halyqtyń jalpy ólimi kórsetkishiniń 24,8%-ǵa tómendeýi baıqalady, alaıda ol ortasha respýblıkalyq mánnen 70,2%-ǵa artyq», - dep atap ótti Densaýlyq saqtaý vıtse-mınıstri Vıacheslav Dýdnık.
Onyń aıtýynsha, óńirde qanaınalym júıesi aýrýlarynan bolatyn ólim-jitim kórsetkishi ótken jyldyń sáıkes kezeńimen salystyrǵanda 14,4%-ǵa tómendedi, bul – respýblıkalyq ortasha kórsetkishten 20%-ǵa artyq. Sonymen qatar, SQO-da jaraqattardan, ýlanýdan jáne jazataıym oqıǵalardan bolatyn ólim-jitim 2021 jyldyń sáıkes kezeńimen salystyrǵanda 13,3%-ǵa tómendegeni baıqalady.
Vıtse-mınıstr aýrýhana ǵımarattarynyń tozýy, arnaıy beıin mamandarynyń, ásirese kardıologııa men akýsherııada tapshylyǵy, dıagnostıkalyq jabdyqtardyń jetkiliksiz parkine qatysty negizgi problemalyq máselelerge nazar aýdardy. Mysaly, V. Dýdnıktiń aıtýynsha, 13 aýdandyq aýrýhananyń tek 4-ýinde ǵana kardıolog dárigerler bar, qalǵandarynda almastyratyn dárigerler nemese JPD dárigerleri jumys isteıdi.
