SQO-da oqýshylardyń 30-dan astam sport sharasy keıinge shegerildi
SQO bilim berý basqarmasynyń jetekshisi Gúlmıra Kárimova óńirlik kommýnıkatsııalar qyzmetinde brıfıng ótkizip, ınfektsııalyq aýrýlardyń aldyn alýǵa baılanysty oqý oryndarynda atqarylyp jatqan sanıtarlyq-epıdemıologııalyq is-sharalar jaıynda málim etti.
Basqarma jetekshisiniń málimetinshe, mektep oqýshylaryn toqsandyq jıyntyq baǵalaý aldaǵy eki-úsh kúnde tolyq aıaqtalýy qajet. Alaıda, bir kúnde test jumystarynyń sany 3-4 aspaýy qajet. Sol sebepti qamqorshylyq keńespen kelise otyryp, 14 naýryz kúni qalǵan TJB alynbaq.
«Densaýlyǵyna baılanysty sabaqtan jıi qalǵan balalardan toqsandyq jıyntyq baǵalaý jeke keste boıynsha alynady. Al muǵalimderge demalys ýaqytynda oqylmaı qalǵan taqyryptar boıynsha oqýshylarǵa tapsyrmalardy qashyqtan berýdi usynamyz. Bul ýaqytta elektrondy jýrnal qoljetimdi bolady. Ustazdarǵa da jumysty qashyqtan, ıaǵnı, mektepke kelmeı-aq jumys isteýge múmkindik beriledi», - dedi Gúlmıra Kárimova.
Óńirdegi mektepke deıingi bilim berý mekemeleri shtattyq tártipte jumys isteı beredi. Alaıda, juqpaly aýrýlardyń aldyn alý úshin balabaqshalar men shaǵyn ortalyqtarda tıisti dezınfektsııalyq jumystar júrgizilmek. Oǵan qajetti preparattar jetkilikti.
«Kolledjder qashyqtan oqytýǵa aýysady. Osyǵan oraı «Sova» aqparattyq-saraptamalyq júıesin iske qostyq. Oqytýshylardyń jeke kabınetteri quryldy. Onda barlyǵy – lektsııalar, tapsyrmalar, testter stýdentterge qoljetimdi bolady. Al jataqhanada qalǵysy keletin jastar ınternetpen qamtamasyz etiledi», - deıdi basqarma jetekshisi.
Al jaqynda ótýi tıis respýblıkalyq, oblystyq deńgeıdegi 30-dan astam sporttyq is-shara belgisiz ýaqytqa keıinge qaldyryldy. Sonyń ishinde sporttyń 12 túri boıynsha ótetin «Suńqar» spartakıadasy, mekteptiń ulttyq lıgasy jáne kúresten ótetin «Jastar» spartakıadasy bar.