SQO-da oqýshylar orbıtalyq stansanyń úlgisin jasady
PETROPAVL. QazAqparat – Petropavldaǵy mektepterdiń birinde oqýshylar ǵaryshtyq stansanyń «Kovcheg-1» atty úlgisin jasady. Daryndy balalardyń jobasy ǵalamsharda esh qıyndyqsyz ómir súrýge múmkindik beredi, dep habarlaıdy QazAqparat tilshisi.
«Kovcheg-1» orbıtaldy stansasy – Petropavldaǵy Nazarbaev zııatkerlik mektebi oqýshylarynyń biregeı jumysy. Balalar jobany jazyp shyǵýǵa bir aı ýaqyttaryn jumsaǵan. Orbıtaldy stansa 10 adamǵa shaqtalǵan. Uzyndyǵy – 60, dıametri – 12 shaqyrymdy almaq.
«Álemde ekologııalyq máselelerdiń ózektiligi jyldan-jylǵa artyp keledi. Qorshaǵan ortanyń lastanýy, tabıǵı qorlardyń azaıýy – jańa tirshilik oryndaryn izdeýge ıtermeleýde. Sol sebepti biz orbıtalyq stansanyń prototıpin jasaýdy qolǵa aldyq. Bizdiń ǵarysh kememiz 4 bólikten turady. Onyń birinde adamdar tirshilik etse, qalǵandarynda aýyl sharýashylyǵymen aınalysýǵa, ıaǵnı mal ósirip, egin egýge bolady. Tipti, balyq sharýashylyǵyn damytýǵa da oryn qarastyrdyq», - deıdi joba avtorlarynyń biri Anatolıı Zverev.
Oqýshylardyń esepteýinshe, orbıtalyq ortalyqta bir ǵasyrǵa deıin, sý qory taýsylǵansha ómir súrýge bolady.
«Kovcheg-1» atty orbıtalyq stansamyz tórt bólikke bólingen, árqaısy jeke dara jumys istegenimen, ortalyqtan basqarylady. Ǵarysh kemesine basqa ushý apparattary kelip qona alady. Ǵalamsharymyzda adamdar sany barǵan saıyn artyp keledi. Bolashaqta halyqtyń kóbeıýine baılanysty basqa turatyn oryn izdeý kerek bolady. Sol sebepti jobamyz óte mańyzdy», - deıdi fızıka pániniń muǵalimi, oqýshylardyń jetekshisi Vasılıı Krıýchkov.
