SQO-da oqýshylar men ustazdan KVI anyqtalyp, mektep karantınge jabyldy

PETROPAVL. QazAqparat – Soltústik Qazaqstan oblysyndaǵy Arhangelka orta mektebinde koronavırýs oshaǵy anyqtalyp, mektep tolyq qashyqtan oqýǵa kóshirildi, dep habarlaıdy QazAqparat tilshisi.

SQO bilim basqarmasynyń málimetinshe, Qyzyljar aýdany Arhangelka eldi mekeninde 4 oqýshy men muǵalim koronavırýs ınfektsııasyn juqtyrdy.

Birneshe synyp balalary aýyrǵandyqtan mektep tolyq qashyqtan oqýǵa kóshirildi. Endi 122 balanyń barlyǵy eń kemi eki apta onlaın formatta oqymaq.

Mamandardyń aıtýynsha, tek ótken qarasha aıynda SQO-da 68 oqýshy, 24 muǵalim koronavırýspen aýyrdy. Mektepter karantınge jabylǵanymen oqý protsesi úzilmeıdi, oqytý formaty ǵana aýystyrylady.

Búgin SQO-da koronavırýs boıynsha jaǵdaıdyń turaqtalǵanyn aıtqan edik, óńir «qyzyldan» «sary» aımaqqa kóshti.