SQO-da oqý jyly bastalǵaly COVID-19 juqtyrǵan 56 bala anyqtaldy

PETROPAVL. QazAqparat – Soltústik Qazaqstan oblysynda jańa oqý jyly bastalǵaly balalar arasynda koronavırýsty juqtyrýǵa qatysty 56 jaǵdaı tirkeldi, dep habarlaıdy QazAqparat tilshisi.

SQO óńirlik kommýnıkatsııalar qyzmetinde Densaýlyq saqtaý jáne Sanıtarlyq-epıdemıologııalyq baqylaý departamentteriniń ókilderi aımaqtaǵy epıdemıologııalyq jaǵdaıǵa baılanysty brıfıng ótkizdi.

Mamandardyń aıtýynsha, óńirde koronavırýsqa qatysty jaǵdaı kúrdeli. Soltústik Qazaqstan oblysy qaıtadan «qyzyl aımaqqa» kirdi. Tek ótken aptada oblysta aýrýdyń 61 jaǵdaıy tirkeldi. Sonyń 18-i Petropavlǵa tıesili. Ýálıhanov aýdanynda aýyrǵandar sany kúrt artyp, birden 11 adamda anyqtalǵan.

«Jasyl aımaqtan» eki-úsh kúnniń ishinde «qyzyl aımaqqa» kirdik. Onyń basty sebebi – karantın talaptaryn oryndamaý. Maska taqpaý, araqashyqty saqtamaý. Monıtorıng toptary kúndelikti tekserýge shyǵyp, tyǵylyp toı ótkizip jatqandardy anyqtaıdy. Týǵan kún, úılený toıy, qudalyq – halyqty jınap, oıyn-toı ótkizýdiń qaýipti ekenin aıtsaq ta, aıyppul salsaq ta toqtaý joq. Petropavldyń jabylǵany da eshkimge kedergi emes», - deıdi Petropavl qalalyq Sanıtarııalyq-epıdemıologııalyq baqylaý basqarmasynyń bastyǵy Áset Jumataev.

COVID-19-dy juqtyrý balalar arasynda da artqan. Jańa oqý jyly bastalǵaly vırýs 56 balada tirkelgen. Onyń jartysyna jýyǵy bilimdi qashyqtan alǵan. Balabaqshaǵa kezekshi topqa barǵan eki búldirshinnen de koronavırýs anyqtalyp otyr. Al ustazdardyń 5-ýi qaýipti aýrýdy juqtyrsa, olardyń barlyǵy qashyqtan jumys istegen.