SQO-da ókpe obyryna shaldyqqandar sany 20 paıyz azaıdy
PETROPAVL. QazAqparat - Soltústik Qazaqstan oblysynda ókpe obyryna shaldyqqandar sany bıyl 20 paıyz azaıdy. Sonymen qatar osy aýrýdyń saldarynan bolatyn ólim-jitim kórsetkishi de tómendep otyr, dep habarlaıdy QazAqparat.
Dárigerlerdiń aıtýynsha, onkologııalyq aýrýlardyń ishinde taralýy boıynsha ókpe obyry birinshi orynda tur. Syrqattanǵandardyń negizin 60 jastan asqandar quraıdy.
Oblystyq onkologııalyq dıspanserge jyl basynan 189 naýqas tirkeýge alyndy. Bul byltyrǵydan 48 adamǵa az.
Soǵan qaramastan Soltústik Qazaqstan oblysy elimiz boıynsha ókpeniń obyrymen aýyratyndardyń sanynan aldyńǵy oryndarda tur. Mamandardyń sózinshe, elimizde bul dertti anyqtaıtyn skrınıngtik baǵdarlamalar joq. Sondyqtan dertti erte anyqtaý qıynǵa soǵady. Alǵashqy kezeńinde belgili bolǵan jaǵdaıda tolyq emdelip ketý múmkindigi zor. Oblystyq dıspanserde jyl saıyn ókpe obyryna 100-ge jýyq ota jasalady eken.
«Ókpe obyry sýyq aımaqtarda keńinen taralǵan. Aýany lastaıtyn óndiristik kásiporyndardyń kóptigi de áser etedi. Temeki shegý de derttiń asqynýyna ákeledi. Kóbine 50-den asqan er adamdar aýyrady», - deıdi oblystyq onkologııalyq dıspanserdiń bas dárigeriniń emdeý isi jónindegi orynbasary Oleg Dýdıak.
Mamandardyń aıtýynsha, qazir elimiz boıynsha 160 myń qazaqstandyq onkologııalyq esepte tur. Durys tamaqtanbaý, semizdik, temeki shegý, alkogoldi ishimdikterdi shamadan tys paıdalaný qaterli isikke ákeledi eken. Sondaı-aq, hımııalyq qosyndylary bar hot-dog, súrsúbe, shujyq ónimderinen bas tartqan abzal.
