SQO-da «Nurly jer» baǵdarlamasyn júzege asyrýǵa bıyl 15,6 mlrd teńge bólindi
SQO qurylys, sáýlet jáne qala qurylysy basqarmasynyń málimeti boıynsha, byltyr «Nurly jer» memlekettik baǵdarlamasy aıasynda qurylysqa 14,6 mlrd teńge bólindi.
Nátıjesinde turmysy nashar otbasylarǵa jáne ákimdik kezeginde turǵandarǵa arnap bul qarajatqa 8 kommýnaldyq-jalǵa beriletin úı salyndy.
Sondaı-aq «Bereke-2» yqsham aýdanynda 300 páterlik 3 úıdiń qurylysy bastaldy. Qalǵan aqshaǵa «Jas Órken», «Bereke-2», «Ońtústik» yqshamaýdandarynda jáne «Solnechnyı ІІ» kentinde kópqabatty úılerge ınfraqurylym tartylyp, kógaldandyrý jumystary atqarylǵan.
«2020 jyldyń qorytyndysy boıynsha 306 myń sharshy metr turǵyn úı nemese 3 300-den astam páter paıdalanýǵa berildi. 12 myńnan astam soltústikqazaqstandyq turǵyn úı jaǵdaıyn jaqsartty. 2021 jyly turǵyn úı qurylysyna bıýdjetten 15,6 mlrd teńge bólindi. 340 myń sharshy metr turǵyn úı nemese shamamen 3 700 páter salý josparlanǵan. Turǵyn úı oblys ortalyǵynda ǵana emes, aýyldyq jerlerde de paıdalanýǵa berildi. Ótken jyly bıýdjet esebinen 609 úı salyndy.
Memlekettik baǵdarlamany júzege asyrýǵa bıyl da qomaqty soma – 15,6 mlrd teńge bólindi. Aýdan ortalyqtarynda jáne Petropavlda 5 kommýnaldyq jalǵa beriletin jáne 18 nesıege beriletin turǵyn úıdi salý josparlanǵan», - deıdi SQO qurylys, sáýlet jáne qala qurylysy basqarmasynyń baspasóz hatshysy Maıgúl Seıilbek.
2019 jylmen salystyrǵanda qurylys salasyn qarjylandyrý 1,5 esege artqan. Nátıjesinde 3 jyldyń ishinde 7 myńnan astam páter salynyp, paıdalanýǵa berildi. Qazirgi tańda oblys ortalyǵynda kóp qabatty 32 turǵyn úı turǵyzylyp jatyr.
«Jańa baspanalardyń kópshiligi jeke sektordan 3 jylda syrylǵan 1 277 úıdiń ornyna salynyp jatyr. Qalanyń kórkin qashyrǵan eski úıler áli de buzylyp alynady. Ony júzege asyrý úshin «Jańa qala» renovatsııalyq baǵdarlamasy qolǵa alyndy. 2021 jyly 360 myń sharshy metr salynbaq», - deıdi Maıgúl Seıilbek.
